Իրանի արտգործնախարարն այսօր ժամանում է Կահիրե
Իրանական Mehr լրատվական գործակալության փոխանցմամբ՝ աֆրիկյան շրջագայության մեջ գտնվող Իրանի արտգործնախարար Ալի Աքբար Սալեհին այսօր ժամանելու է Կահիրե: Դա կլինի 2011 թվականի փետրվարին Հոսնի Մուբարաքի կառավարության տապալումից հետո իրանցի բարձրաստիճան պաշտոնյայի առաջին այցը Եգիպտոս:
Սալեհին Եգիպտոս է ժամանելու Բուրկինա Ֆասոյից և Կահիրեում մնալու է 3 օր: Իրանի ԱԳՆ-ի խոսնակ Ռամին Մեհմանպարաստը երեկ լրագրողների հետ զրույցում հայտնել էր, որ Սալեհիի եգիպտական այցը կայանում է Եգիպտոսի արտգործնախարար Մոհամեդ Քամել Ամրի համապատասխան հրավերի հիման վրա:
Մեհմանպարաստի պնդմամբ՝ Սալեհին եգիպտացի բարձրաստիճան պաշտոնյաների հետ հանդիպման ժամանակ քննարկելու է երկկողմանի հարաբերություններն ու տարածաշրջանային զարգացումները: Մեհմանպարաստը հույս էր հայտնել, որ Սալեհիի այդ այցն էլ ավելի արդյունավետ կդարձնի երկու երկրների համագործակցությունը:
Սալեհին Եգիպտոսում հանդիպումներ է ունենալու նախագահ Մուհամեդ Մուրսիի, վարչապետ Հեշամ Քանդիլի հետ: Չի բացառվում նաև, որ նա հանդիպի նաև Սիրիայի հարցով ՄԱԿ-ի ու ԱՊԼ-ի հատուկ ներկայացուցիչ Լախդար Բրահիմիի հետ: Իրանի ու Եգիպտոսի միջև հարաբերությունները սկսել են ակտիվանալ այն բանից հետո, ինչ Մուհամեդ Մուրսին նախորդ տարի դարձավ Եգիպտոսի նախագահ:
