«Պատժախուցը տրամադրող միջավայր է` կարդալու և մի քիչ մտածելու համար». ՀԱԿ ակտիվիստ

«Խուլիգան ոստիկաններ», «Ոչ քաղաքական հետապնդումներին» և նման ցուցապաստառներով այսօր կոնգրեսականները ի պաշտպանություն ՀԱԿ ակտիվիստների, գլխավոր դատախազության մոտ հերթական բողոքի ակցիան էին անցկացնում:

Ազատազրկման դատապարտված ՀԱԿ ակտիվիստ Սարգիս Գևորգյանը aravot.am-ի հետ զրույցում նշել է, որ երեկ Վճռաբեկ դատարան բողոք են ներկայացրել, և եթե մի քանի ժամ էլ ուշացնեին` հնարավոր է՝ արդեն կալանավորված լինեին: Մեկ ամսվա ընթացքում Վճռաբեկ դատարանը կա’մ պետք է բողոքն ընդունի վարույթ, կա’մ մերժի, որից հետո ողջամիտ ժամկետում պետք է որոշում կայացնի` դատարանի որոշումը բեկանի՞, թե՞ թողնի նույնը: Սարգիսը որևէ ակնկալիք չուներ Վճռաբեկից էլ:

aravot.am-ի հարցին` հոգեբանորեն արդեն պատրա՞ստ եք ազատազրկման` Սարգիսը պատասխանել է. «Հոգեբանորեն մենք պատրաստ ենք սրան այն օրվանից, երբ մտել ենք այս պայքարի մեջ: Որևէ անակնկալ չկար այստեղ: Առաջին օրվանից էլ մենք տրամադրված ենք եղել իշխանության ամենաբիրտ մեթոդներին, որը կարող էր լինել մեր նկատմամբ` ազատազրկում, ֆիզիկական ներգործություն: Այնպես որ, տրամաբանական էր այս գործի ընթացքն էլ: Մենք բազմիցս ապացուցել ենք իշխանությանը, որ մենք պատրաստ ենք եղել այդ կռվին: Մենք ազատազրկման վայրից էլ կռիվ կանենք»:

aravot.am-ի դիտարկմանը, որ դու կարող էիր ամենասովորական ուսանող լինեիր, քեզ համար գնայիր դասի-գայիր, չմտնեիր քաղաքական պայքարի մեջ ու քեզ չէր սպառնա այս ազատազրկումը, չե՞ս զղջում հիմա, որ քո կյանքից մի քանի տարի փաստորեն կորելու է` նա պատասխանեց. «Բացարձակ չեմ փոշմանել, որովհետեւ երբեք չեմ հավակնել ապրելու հարմարավետ կյանքով, բայց անտեսել այն, ինչ կատարվում է երկրում, անտեսել այն երևույթները Հայաստանում առկա, որոնք ուղղակի Հայաստանը դեպի կործանում են տանում: Այս երեք տարվա ընթացքում ես մենակ շահել եմ թե’ կրթության առումով, թե’ ժամանակի արդյունավետ ծախսման առումով: Իմ ամեն օրը հիմա ես համարում եմ, որ օգուտ է Հայաստանի ապագայի վերականգնման գործում: Այդ առումով ես բացարձակապես չեմ փոշմանում: Եթե անգամ պահանջվի եւս 5 տարի, ես, միևնույն է, ևս 5 տարի կմնամ այդ նույն դիրքերում»:

Հարցին` պատկերացնո՞ւմ ես քեզ պատժախցում` նա պատասխանել է. «Ես էլի եմ եղել պատժախցում: Տրամադրող միջավայր է` կարդալու և մի քիչ մտածելու համար: Ինչքան էլ որ մեզ ազատազրկում են պատերով, մենք այնտեղ մեզ չենք համարում կալանավոր, մենք գիտենք հստակ, թե ինչի համար ենք այնտեղ ու գիտենք, որ մենք այնտեղ ենք, որովհետև իշխանությունները վախենում են այն պրոցեսից, որը գնում է հիմա: Մենք այնտեղ ենք լինելու այնքան ժամանակ, քանի դեռ իշխանությունները վախենում են մեզնից: Եթե այդ վտանգը վերանա, ուրեմն մենք մի բան սխալ ենք անում»: