Արամ Մանուկյանը կասկածում է, որ ԵԽ փոխնախագահն ասեր Ծառուկյանի՝ նախագահի լավ թեկնածու լինելու մասին

ԱԺ ՀԱԿ խմբակցության քարտուղար Արամ Մանուկյանը թերահավատորեն է մոտենում ԲՀԿ տարածածած հաղորդագրությանը, թե Եվրոպական խորհրդարանի փոխնախագահ Ալեխո Վիդալ Քվադրաս Ռոկան նախօրեին Բրյուսելյան հանդիպման ժամանակ  նշել է, որ «առաջիկա նախագահական ընտրություններում Գագիկ Ծառուկյանը կարող է հիանալի թեկնածու լինել, քանզի առանձնանում է մարդկային ու լավատեսական հատկանիշներով»:

«Եվրոպայի իրենց այցելությունը եղել է զուտ ճանաչողական,  պրոտոկոլային: Եվ Եվրոպայի որևէ քաղաքական ուժ, հավատացեք, երբեք որևէ թեկնածուի չի ասի՝ ես քեզ կողմ եմ կամ դեմ եմ: Սա ներկայացնելու հանդիպումներ են եղել, որովհետև թերթերում տեսա լուրեր, որոնք իրականությանը չէին համապատասխանում: Ես էլ իրենցից պետք է ճշտեմ ձեր հարցերի պատասխանները: Եվրոպայի սկեպտիկների խմբի հետ հանդիպման մասին էլ էի մեր մամուլում կարդացել, բայց այդ խմբի հետ մեկ շաբաթ առաջ հանդիպել եմ , գիտեմ իրենց դիրքորոշումը, որ իրենք այնպիսի հարցեր, որոնք գրված են մեր  մամուլում,  ԲՀԿ-ի հետ չէին  քննարկել: Մասնավորապես ԲՀԿ-ի  առաջ պայման դնել, որ «Единая Россия»-ի, Չինաստանի, Բելառուսի հետ կապված հայտարարություն անեն , նման բաներ չի եղել, բայց մեր մամուլում գրվեց»,- Aravot.am-ի հետ զրույցում ասել է պարոն Մանուկյանը:

«Անհնար է երկրում պայքարել կոռուպցիայի դեմ, եթե հիմնական կոռումպացված անձինք են այդ պայքարը ղեկավարում»,- ԲՀԿ առաջնորդ Գագիկ Ծառուկյանի այս հայտարարությանն անդրադառնալով, պարոն Մանուկյանը հավելել է. «Եթե այդ մարդիկ մտել են քաղաքական դաշտ, միգուցե իսկապես  գնան զոհաբերությունների, ինչի մասին իրենք ասում  են: Մարդիկ հրաժարվել  են շատ բաներից՝ մարզպետերի, նախարարների պաշտոններից: Հստակ քաղաքական դիրքորոշումներ  են հանդես բերում, այս դեպքում զգում ես,որ  ինչ-որ բան փոխվել է»:

Անդրադառնալով ընդդիմադիր հնարավոր միասնական թեկնածուին, ՀԱԿ խմբակցության քարտուղարն ասաց, որ այլ քաղաքական ուժերի հետ բանակցությունների այս փուլում  թեկնածուի անուն չեն քննարկում.

«Եթե այս փուլում հաջողացնենք  խնդիրներ եւ առաջնահերթություններ դասակարգել ու ծրագիր մշակել, թե առաջիկա իշխանությունն  ինչ պետք է անի, դրանից հետո կանցննեք հաջորդ հարցին, թե ով կարող է այդ ծրագիրն իրականացնել: Քանի որ չենք ավարտել առաջին փուլը, չենք կարող որոշել՝  ով կարող է այդ բեռը  բարձրացնել: Այս փուլում ոչ մի կուսակցություն որեւէ թեկնածու չի առաջադրել և այդ բանակցությունների ժամանակ որեւէ անուն չի քննարկվում»:

aravot.am
Լուսանկարը՝ Գագիկ Շամշյանի