Հակոբյանը Առուշանյանին նյութապես շահագրգռելով՝ պատվիրել է սպանել Զատիկյանին

Ս. Զատիկյանի սպանության դեպքի առթիվ 2006թ. հարուցված քրեական գործի շրջանակներում ՀՀ կառավարությանն առընթեր ոստիկանության քննչական գլխավոր վարչության ՀԿԳ քննության վարչությունում ավարտվել է Ս. Հակոբյանի կողմից  Ս. Զատիկյանի սպանությունը կազմակերպելու մասով քննությունը:

Նրա վերաբերյալ գործն անջատվել է առանձին վարույթ, քրեական գործով դատավարական ղեկավարում իրականացնող դատախազը հաստատել է մեղադրական եզրակացությունը և ուղարկել դատարան։ Այս մասին տեղեկացնում է ՀՀ գլխավոր դատախազությունը:

Մինչդատական վարույթի ընթացքում ձեռք բերված փաստական տվյալների համաձայն` Ս. Հակոբյանը, Ս. Զատիկյանի հետ նախկինում ունեցած վիճաբանության պատճառով վրեժխնդիր լինելու նպատակով, նախնական համաձայնության գալով Ն. Խաչատրյանի հետ, Ա. Առուշանյանին նյութապես շահագրգռելով պատվիրել է սպանել Ս. Զատիկյանին:

Ա. Առուշանյանը 2006թ. հունիսի 22-ին` ժամը 14:45-ի սահմաններում, Սեբաստիա և Տիչինա փողոցների խաչմերուկում, «ԱԿՍ» տեսակի ինքնաձիգով շատերի կյանքի համար վտանգավոր եղանակով  կրակել է Սեդրակ Զատիկյանի վարած ավտոմեքենայի վրա, որի հետևանքով մեքենայի ղեկի մոտ նստած Ս. Զատիկյանը և պատահական անցորդ Կարինե Սարգսյանը  տեղում մահացել են:

Բացի այդ, նախաքննությամբ պարզվել է նաև, որ Ս. Հակոբյանը ապօրինի կերպով ձեռք է բերել եւ պահել ռազմամթերք հանդիսացող փամփուշտներ, որոնք հայտնաբերվել են նրա տան խուզարկությամբ:

Ձեռք բերված փաստական տվյալների հիման վրա Ս. Հակոբյանին մեղադրանք է առաջադրվել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով եւ 235-րդ հոդվածի 1-ին մասով: Քրեական գործը մեղադրական եզրակացությամբ ուղարկվել է Երեւան քաղաքի Մալաթիա-Սեբաստիա վարչական շրջանի ընդհանուր իարավասության առաջին ատյանի դատարան:

Նշենք, որ Ա. Առուշանյանի, Ա. Հովհաննիսյանի և Լ. Ղևոնդյանի մասով գործը դատարան է ուղարկվել տարիներ առաջ և Երևան քաղաքի Մալաթիա-Սեբաստիա վարչական շրջանների ընդհանուր իրավասության առաջին ատյանի դատարանի դեռևս 2007 թվականի դատավճռով Ա. Առուշանյանը մեղավոր էր ճանաչվել ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ, 7-րդ եւ 8-րդ կետերով և 235-րդ հոդվածի 1-ին մասով, Ա. Հովհաննիսյանը և Լ. Ղևոնդյանը` ՀՀ քրեական օրենսգրքի 38-104-րդ հոդվածի 2-րդ մասի 1-ին, 6-րդ, 7-րդ և 8-րդ կետերով:

Ս. Հակոբյանի և Ն. Խաչատրյանի նկատմամբ 2007 թվականին հայտարարվել էր հետախուզում։ Ս. Հակոբյանը հայտնաբերվել է 2011 թվականի դեկտեմբերի 14-ին, իսկ Ն.Խաչատրյանի նկատմամբ հետախուզումը շարունակվում է։