Հենրիխ Մխիթարյանն անդրադարձել է իր հասցեին հնչող քննադատություններին
Հայաստանի ֆուտբոլի ազգային հավաքականի և Լոնդոնի «Արսենալ»-ի կիսապաշտպան Հենրիխ Մխիթարյանն անդրադարձել է իր և իր թիմի հասցեին հնչող քննադատություններին: Ինչպես հաղորդում է BBC-ն, Մխիթարյանն ընդգծել է, որ չի հասկանում, թե ինչու են մարդիկ այդքան քննադատում:
«Ես ինքս իմ ամենամեծ քննադատն եմ, դրա համար լրացուցիչ քննադատության կարիք չունեմ: Ես շատ լավ գիտեմ, թե ինչ եմ տալիս թիմին և շատ լավ գիտեմ, թե ինչ է թիմը ինձ տալիս: Մենք նոր մարզիչ ունենք և փորձում ենք հարմարվել նրա փիլիսոփայությանը և հասկանալ նրա պահանջները: Մրցաշրջանը մեզ համար դժվար սկսվեց, մենք դիմակայեցինք երկու հրաշալի թիմերի՝ «Մանչեսթեր Սիթի»-ին և «Չելսի»-ին, սակայն Պրեմիեր լիգայում հեշտ մրցակիցներ չկան: Մենք պարտվել ենք մեկնարկային երկու խաղերում, բայց սա ֆուտբոլ է: Մենք պետք է շարունակենք դրական տրամադրվել և լավ արդյունքները չեն ուշանա»,- ասել է Հենրիխ Մխիթարյանը:
Նա հավելել է, որ իրենք ճնշում չեն զգում, չեն մտածում, որ ինչ-որ բան այն չէ: Մխիթարյանն ընդգծել է, որ քննադատություններին ուշադրություն չի դարձնում, քանի որ շատ լավ գիտի, թե երբ է լավ խաղացել, իսկ երբ՝ վատ:
Անգլիայի Պրեմիեր լիգայի առաջին տուրում «Արսենալ»-ը 2-0 հաշվով պարտություն կրեց «Մանչեսթեր Սիթի»-ից, իսկ երկրորդ տուրում՝ Լոնդոնի «Չելսի»-ից՝ 3-2 հաշվով: «Չելսի»-ի դեմ խաղում Հենրիխ Մխիթարյանը դարձավ գոլի և գոլային փոխանցման հեղինակ:
