«Չարաշահում, հավելագրում չի եղել». Արա Մինասյան. «ՀԺ»
Երևանի «Սուրբ Գրիգոր Լուսավորիչ» ԲԿ տնօրեն Արա Մինասյանը «Հայկական ժամանակ»-ի հետ զրույցում հերքել է իր հեռացման մասին լուրերը՝ նշելով, որ թեև ստուգումեր են իրականացվում իր ղեկավարած հիմնարկում, սակայն չարաշահում չկա, ոչ էլ՝ հավելագրում: Հիվանդները եղել են, բուժվել են, գնացել են:
Թերթի դիտարկմանը, որ Առողջապահության նախարարը մի տեղեկանք էր հրապարակել, ըստ որի ստացվում էր՝ մեկ ամսվա մեջ միևնույն մարդը վեց անգամ ստացել էր նույն տեսակի բուժօգնությունը (ինչի դիմաց վճարել էր պետությունը), Ա. Մինասյանն արձագանքել է. «Եղել է այդպիսի բան: Այդ մարդը եղել է անօթևան, եկել է, դուրս է գրվել, նորից տարբեր տեղերից իրեն շտապ օգնության մեքենայով բերել են: Վեց անգամ: Վեց անգամն էլ ոստիկան է հրավիրվել: Երբ ալկոհոլային թունավորմամբ են ընդունվում (ինքը անօթևան էր, նաև հարբեցող), դա համարվում է դատական դեպք: Վեց անգամ եկել է ոստիկան, վեց անգամ շտապօգնության մեքենան է իրեն բերել, հետևաբար վեց հատ հիվանդության նկարագիր պիտի բացվեր:
Առաջին հայացքից սա տարօրինակ բան է, նախարարին զեկուցել են ոչ լիարժեք, բայց հետո պարզվել է ամեն ինչ, նախարարն էլ, կարծում եմ, համոզվել է, որ վեց անգամ ոստիկանը չէր կարող հենց այնպես գալ ու վեց անգամ շտապ օգնության մեքենան հենց այնպես չէր բերի այդ մարդուն: Տարբեր հասցեներից բերել է»:
Ամբողջությամբ կարող եք կարդալ թերթի այսօրվա համարում:
