Ընտրություններին լրատվամիջոցների հավատարմագրումը պետք է լինի խիստ հասցեական. ԸՕ բարեփոխումների քննարկում
Ընտրություններին լրատվամիջոցների հավատարմագրումը պետք է լինի խիստ հասցեական: ՀՀ կառավարության նիստերի դահլիճում տեղի ունեցած ընտրական օրենսդրության բարեփոխումների հարցի շուրջ քննարկման ժամանակ այս հարցը բարձրացրեց «Երկիր Մեդիա» հեռուստաընկերության լրատվական բաժնի ղեկավար Գեղամ Մանուկյանը: Նրա խոսքով՝ քվեարկության օրը բազմաթիվ հասարակական կազմակերպությունների ներկայացուցիչներ լրագրողների բեյջերով գործունեություն են ծավալում:
«Եկեք աչքակապություն չանենք, բոլորս էլ գիտենք, որ մեկ լրատվամիջոցի 50 բեյջ է տրվում, հետո, չգիտես ինչպես, այդ բեյջերը հասարակական կազմակերպությունների ձեռքում են հայտնվում: «Գռդոնչի» լրատվամիջոցներին չպետք է այդքան բեյջեր տրվեն, լրատվամիջոցը պետք է ապացուցի, որ այդքան լրագրող ունի ու վճարում է նրանց»,-ասաց Գեղամ Մանուկյանը:
Հայաստանի ժուռնալիստների միության նախագահ Սաթիկ Սեյրանյանն էլ նշեց, որ Կենտրոնական ընտրական հանձնաժողովի կողմից տրված բեյջերը, հավատարմագրերը պետք է լինեն անվանական, այլ ոչ թե մեկ լրատվամիջոցի մի քանի տասնյակ բեյջ տրվի, հետո պարզ չլինի, թե դրանք ում են հասնում:
