«Առողջապահության ոլորտը շատ սպեցիֆիկ է. լայնամասշտաբ օպերացիաներ, տարբեր տասնյակ կամ քսան մարդու ձերբակալումներ չեն կարող լինել». Արսեն Թորոսյան
«Խոսքը ոչ թե այս պահին չարաշահումների մասին էր, այլ գումարների անարդյունավետ բաշխումների մասին, որը մեր պետությունն իրեն թույլ տալ չէր կարող»,- այսօր ԱԺ-ում լրագրողների հետ զրույցում հայտարարեց ՀՀ առողջապահության նախարար Արսեն Թորոսյանը` անդրադառնալով ԱԱԾ-ի հետ իրենց աշխատանքին:
Ըստ նրա` երբ կա որևէ հիվանդությունից մահացող մարդ, պետությունը չի կարող իրեն շռայլություն թույլ տալ առողջարանային բուժման մասով:
Ա.Թորոսյանը նշեց, որ չարաշահման մեկ դեպքով նամակ է ուղարկել ԱԱԾ, ընդ որում` ոչ իր բացահայտած. «Հարցը գնումների ոլորտին է վերաբերում: Ընդհանրապես առողջապահության ոլորտը, ուզում եմ բոլորս ֆիքսենք, շատ սպեցիֆիկ և նուրբ ոլորտ է և լայնամասշտաբ օպերացիաներ, տարբեր տասնյակ կամ քսան մարդու ձերբակալումներ չեն կարող լինել: Ամեն կոնկրետ հիմնարկով կամ ծրագրով զբաղվում են, որոշումներ են կայացնում, գումարների վերաբաշխում, վերադարձ, և երբ 1-2 ամիս հետո այդ բոլորը կունենանք աչքի առաջ, որ, ենթադրենք, 1 մլրդ կարողացանք անարդյունավետ բաշխումներից ետ բերել բյուջե, կորոշենք, թե դա ինչի վրա ենք ծախսում»:
