«Բոլոր խնդիրները լուծելի են». Մանե Թանդիլյանը` պարտադիր կուտակայինի մասին
Այսօր Ազգային ժողովում 2017թ. բյուջեի կատարողականի քննարկումների մեկնարկից առաջ Աշխատանքի և սոցիալական հարցերի նախարար Մանե Թանդիլյանը լրագրողների հետ զրույցում պարզաբանեց, թե ինչու մեկ տարով հետաձգվեց կենասաթոշակային պարտադիր կուտակային համակարգի ներդրումը։
«Օրենքը լրամշակելու և քաղաքացիների կարծիքը հաշվի առնելու համար է ժամանակ վերցվել, և ես առաջարկում եմ հետաձգել և վերանայել այն դրույթները, որոնք մեր քաղաքացիների համար ընդունելի չեն: Ես ստացել եմ բազմաթիվ առաջարկեր, որոնք բավականին խելամիտ և ողջամիտ են, և դա համար ժամանակ է անհրաժեշտ»,- ասաց Մ.Թանդիլյանը:
Ըստ նրա` արդեն իսկ շատ բազմազան և հետաքրքիր առաջարկություններ կան, որոնք իսկապես քննարկման արժանի են:
Դիտարկմանը, որ տնտեսագետները տարբեր խնդիրների մասին են խոսում, որոնք կարող են առաջանալ համակարգի հետաձգման դեպքում, նախարարը պատասխանեց, որ բոլոր խնդիրները լուծելի են.
«Հենց դրա համար են քննարկումները, որ խնդիրներին լուծում տրվի: Դրա համար պետք է ներգրավենք բոլոր կոմպետենտ, մասնագետ մարդկանց, որպեսզի կարողանանք լավագույն լուծումը գտնել, որ համակարգն ընդունելի լինի»:
Հիշեցնենք, որ կառավարությունը որոշել է 1 տարով հետաձգել այս տարվա հուլիսի 1-ից կուտակային կենսաթոշակի պարտադիր բաղադրիչի ներդրումը։ Ընդ որում` այն ուժի մեջ պետք է մտներ դեռ նախորդ տարի, սակայն որոշման կիրառումը մեկ տարով հետաձգվել էր։
