Պուտինն առաջարկեց վարչապետ վերանշանակել Մեդվեդևին
Վլադիմիր Պուտինն առաջարկեց վարչապետի պաշտոնում նշանակել Դմիտրի Մեդվեդեւին: Նրա թեկնածությունը ներկայացվել է Պետդումա՝ կառավարության ղեկավար նշանակելու համաձայնություն ստանալու համար, տեղեկացնում է «Ինտերֆաքս»-ը:
Սպասվում է, որ այսօր վարչապետի թեկնածուն կոնսուլտացիաներ կանցկացնի խորհրդարանական խմբակցությունների հետ: Պետդումայի՝ կառավարության նոր ղեկավարի հաստատմանը նվիրված նիստը նշանակված է մայիսի 8-ին:
Մայիսի 7-ին ՌԴ նախագահի պաշտոնակալման արարողությունից հետո Դմիտրի Մեդվեդեւը կարգադրություն է ստորագրել կառավարության լիազորությունները վայր դնելու մասին, ինչը պահանջում է Սահմանադրությունը: Նախարարների կաբինետի բոլոր անդամներն անցել են ժամանակավոր պաշտոնակատարների կարգավիճակի` մինչեւ նոր կառավարության ձեւավորումը:
