Մերկելը մայիսի 18-ին կայցելի Սոչի՝ բանակցելու Պուտինի հետ
ԳԴՀ-ի նախարարների կաբինետի ներկայացուցիչը մայիսի 7-ին ՏԱՍՍ-ին հաստատել է կանցլեր Անգելա Մերկելի մայիսի 18-ի այցը Սոչի՝ չբացահայտելով դրա մանրամասները: «Սոչի այցը կկայանա մայիսի 18-ին:
Հետագա տեղեկատվությունը մեր կողմից կհրապարակվի ավելի ուշ»,-նշել է նա: Այն մասին, որ Մերկելն աշխատանքային այցով Սոչի կայցելի մայիսի 18-ին, մայիսի 7-ին ավելի վաղ հայտնել էր ռուսական պետության ղեկավարի օգնականի պաշտոնակատար Յուրի Ուշակովը:
ԳԴՀ-ի կառավարության ներկայացուցիչ Ուլրիկե Դեմերը մայիսի 7-ին կայացած ճեպազրույցում հիշեցրել է, որ Մերկելն ինքն է ավելի վաղ հայտարարել ՌԴ նախագահ Վլադիմիր Պուտինի հետ հնարավոր մոտալուտ հանդիպման մասին: Ապրիլի կեսերին ԳԴՀ-ի կառավարության ղեկավարն ասել էր, թե հույս ունի Ռուսաստանի նախագահի հետ ուղղակի բանակցություններ վարել «տեսանելի ապագայում», հաղորդել է ՏԱՍՍ-ը:
