Իրաքյան Քրդստանում մեկնարկել է անկախության հանրաքվեն
Իրաքի քրդական ինքնավարության տարածքում սեպտեմբերի 25-ին մեկնարկել է անկախության հանրաքվեն: Ինչպես հայտնել է Rudaw հեռուստաալիքը, քվեարկության համար տեղամասերը բացվել են տեղական ժամանակով ժամը 07:00-ին (Երեւանի ժամանակով ժամը 08:00-ին) եւ աշխատանքը կավարտեն 19:00-ին:
Ընդհանուր առմամբ անկախության հանրաքվեին մասնակցելու համար գրանցվել է 5,2 մլն մարդ, նրանք պետք է «այո» կամ «ոչ» պատասխանեն հարցին՝ «Դուք ցանկանում եք արդյոք, որ Քրդստան տարածաշրջանը եւ նրա սահմաններից դուրս գտնվող քրդական տարածքները դառնան անկախ պետություն»: Հանրահարցման արդյունքները հայտնի կդառնան տեղամասերի աշխատանքի ավարտից հետո մեկ օրվա ընթացքում:
Դե-յուրե Իրաքյան Քրդստանի մեջ մտնող նահանգներից բացի, հանրահարցումն անցկացվում է վիճելի տարածքներում՝ Քիրկուկի, Նայնավայի, Դիյալայի նահանգներում:
Հանրաքվեի անցկացմանը դեմ են Իրաքի կենտրոնական կառավարությունը՝ այն համարելով ոչ սահմանադրական, ինչպես նաեւ Թուրքիան եւ Իրանը, որոնք հանդես են գալիս արաբական երկրի միասնության օգտին:
Տվյալ փուլում հանրաքվեն անտեղի են համարում Միացյալ Նահանգներում եւ մի շարք եվրոպական երկրներում, քանի որ այն խարխլում է ջանքերը ահաբեկչության դեմ մղվող պայքարում, հաղորդել է ՏԱՍՍ-ը:
