Վաշինգտոնում խաղաղ ցուցարարների վրա հարձակում գործած Էրդողանի կողմնակիցները կանգնել են դատարանի առաջ

ԱՄՆ-ում Թուրքիայի դեսպանի կեցավայրի դիմաց խաղաղ ցուցարարների դեմ հարձակում իրականացնելու դեպքի առթիվ ձերբակալված երկու թուրքի գործով Վաշինգտոնում սեպտեմբերի 7-ին տեղի է ունեցել առաջին դատական նիստը: Ձերբակալված ամերիկաբնակ թուրքերը՝ 45-ամյա Սինան Նարինը Վիրջինիա նահանգից և 50-ամյա Էյուփ Յըլդըրըմը Նյու Ջերսիից հայտարարել են, որ չեն ընդունում իրենց դեմ ներկայացված մեղադրանքները: Այս մասին հայտնում է Washington Times-ը:

Թուրքերը դատարան են բերվել ձեռքերն ու ոտքերը շղթայված: Էրդողանի կողմնակիցները հրաժարվել են արագ դատավարության իրենց իրավունքից՝ թույլ տալով պաշտպանվող կողմի իրավապաշտպաններին մինչև հաջորդ դատական նիստը՝ հոկտեմբերի 10-ը, ուսումնասիրել ներկայացված մեղադրանքները:

Յըլդըրըմն ու Նարինը մեղադրվում են ատելության շարժառիթներով հարձակում գործելու մեջ, ինչը նրանց պատիժը կարող է ավելացնել 1.5 անգամ: Երկու տղամարդկանց դեմ նաև ներկայացված են կանխամտածված բռնության հանցագործություն իրականացնելու մեղադրանքներ՝ քրեորեն պատժելի հանցանք, որը նախատեսում է մինչը 15 տարվա ազատազրկում:

Դատական լսումներին մասնակցել է նաև Թուրքիայի դեսպանության ներկայացուցիչը, ով, սակայն, հրաժարվել է որպես մեկնաբանություն տալ:

Յըլդըրըմն ու Նարինը Թուրքիայի և Միացյալ Նահանգների քաղաքացիներ են: Նրանք երկուսն են այն 19 անձանցից, ում Վաշինգտոնի դատախազությունը մեղադրանք է առաջադրել Էրդողանի այցի ժամանակ խաղաղ ցուցարարների վրա հարձակում իրականացնելու գործով: 19-ից անձանցից 15-ն Էրդողանի թիկնազորի անդամներն են: Վաշինգտոնի ոստիկանությունը հստակեցրել է նրանցից 12-ի ինքնությունը: Ազատության մեջ գտնվող 17 մեղադրյալները ներկայում Թուրքիայում ու Կանադայում են:

Թուրքիայի նախագահ Էրդողանը հաջորդ շաբաթ այցելելու է Նյու Յորք՝ մասնակցելու ՄԱԿ-ի Գլխավոր ասամբլեայի նստաշրջանի բացմանը: Դեռևս հայտնի չէ, թե արդյոք Վաշինգտոնում ծոծկռտուքին մասնակցած նրա թիկնազորի անդամները կուղեկցեն նրան, թե ոչ:

Վաշինգտոնի ոստիկանապետ Փիթեր Նյուշեմը հունիսի 15-ին մամուլի ասուլիսի ժամանակ հայտարարել էր, որ եթե թիկնազորի այդ անդամները վերադառնան ԱՄՆ, նրանք չեն ունենա դիվանագիտական անձեռնմխելիություն ու ժամանելուն պես կձերբակալվեն:

Միացյալ Նահանգներ այցելող Թուրքիայի նախագահ Ռեջեփ Թայիփ Էրդողանի դեմ մայրաքաղաք Վաշինգտոնում մայիսի 16-ին կազմակերպված խաղաղ ցույցի մասնակիցները մի խումբ թուրք ազգայնամոլների կատաղի հարձակման թիրախ են դարձել: Մի քանի վիրավորներ արնաշաղախ հիվանդանոց են տեղափոխվել: Հայտնի է դարձել, որ հարձակումն իրականացրածների շարքում են եղել նաև Էրդողանի անվտանգության աշխատակիցները: Ավելի ուշ հայտնված տեսանյութում երևում է, թե ինչպես է հենց Էրդողանը տալիս ցուցարարների վրա հարձակվելու հրահանգը:

Վաշինգտոնի քաղաքապետ Մուրիել Բոուսերը և ոստիկանապետ Փիթեր Նյուշեմը հունիսի 15-ին կայացած համատեղ մամուլի ասուլիսի ժամանակ հայտարարել են, որ մայիսի 16-ին խաղաղ ցուցարարների վրա հարձակում իրականացրած՝ Թուրքիայի նախագահ Ռեջեփ Թայիփ Էրդողանի կողմնակից խմբի 12 անդամի ձերբակալության հրաման է տրվել:

ԱՄՆ Ներկայացուցիչների պալատը հունիսի 6-ին միաձայն ընդունել է թիվ 354 երկկուսակցական բանաձևը, որը դատապարտում է մայիսի 16-ին ԱՄՆ-ում Թուրքիայի դեսպանի նստավայրի դիմաց Ռեջեփ Թայիփ Էրդողանի թիկնապահների կողմից խաղաղ ցուցարարների դեմ բռնությունը և կոչ է անում օրինազանցներին ենթարկել քրեական պատասխանատվության և քայլեր ձեռնարկել նմանատիպ միջադեպերը բացառելու համար: Բանաձևին կողմ է քվեարկել 397 ներկայացուցիչ: