Վահան Մարտիրոսյանը ռումբի տեղադրման մասին ահազանգի պահին աշխատավայրում չի եղել
ՀՀ Տրանսպորտի կապի եւ տեղեկատվական տեխնոլոգիաների նախարարության շենքի տարածքում ոստիկաններն ու ԱԻՆ աշխատակիցները շարունակում են փնտրել ենթադրյալ ռումբը: «Արմենպրես»-ի թղթակիցը դեպքի վայրից հայտնում է, որ նախարարության բոլոր աշխատակիցները տարհանվել են շենքից:
Նախարար Վահան Մարտիրոսյանի մամուլի խոսնակ Անահիտ Առաքելյանի խոսքով՝ ռումբի մասին ահազանգը ստանալու պահին նախարարը եւս շենքում չէր: «Նա մասնակցում է Վարդենիս-Մարտակերտ ճանապարհի բացմանը: Մենք ամեն րոպե նրան տեղեկատվություն ենք փոխանցում: Այս պահին ոստիկանները շարունակում են աշխատել շինության ներսում»,- «Արմենպրես»-ի հետ զրույցում ասաց նա:
Սեպտեմբերի 1-ին, ժամը 10:26-ին ոստիկանությունից տեղեկություն է ստացվել, որ Երևան քաղաքի Տրանսպորտի նախարարությունում ռումբ կա տեղադրված:
Դեպքի վայր են մեկնել մեկ մարտական հաշվարկ, Ճգնաժամային կառավարման ազգային կենտրոնի արտակարգ իրավիճակների արձագանքման խումբը, Հատուկ նշանակության փրկարարական աշխատանքներ իրականացնող կենտրոնի փրկարարական ջոկատը և սակրավորների խումբը:
