«Ձեր կողքը կանգնած ենք, երբ սահմանին կռիվ կա, բայց դա չի նշանակում, որ ինչ բերեք, պիտի անցնի». Ա.Մանուկյան
![](https://168.am/wp-content/uploads/2016/02/Aram-Manukyan.jpg)
Այսօր ԱԺ նիստում Ընտրական օրենսգրքի քննարկումների ժամանակ ՀԱԿ խմբակցության քարտուղար Արամ Մանուկյանը շնորհակալություն հայտնեց ՀՀ կառավարության աշխատակազմի ղեկավար-նախարար Դավիթ Հարությունյանին` արտահերթ նիստ հրավիրելու հնարավորությունը չբացառելու համար: «Մեր առաջարկները վերջնագրեր չեն, մեր առաջարկները շանտաժ չեն, երբեմն ձեր կողմից եղել են նման գնահատականեր, սրանք ուլտիմատումներ չեն, սրանք լուրջ, պատասխանատու, լուրջ, տրամաբանական, փորձված և իրականացվելիք առաջարկներ են և դրա համար են, որ մենք պնդում ենք այդ առաջարկները և շարունակելու ենք»,- ասաց Ա.Մանուկյանը:
Ըստ նրա, օրինակ, եթե 1991թ. ընտրողների թվից հանենք բոլոր մահացածների թիվը, գումարենք ծնվածների թիվը, որ ընտրելու իրավունք են ստացել, և նույնիսկ չհանելով արտագաղթածների թիվը, ապա չի ստացվում, որ մեզ մոտ քվեարկության իրավունք ունեցող 2.7 մլն մարդ կա: Ա.Մանուկյանը նշեց, որ տրամաբանական է և անհնարին չէ բացականերին առանձին ցուցակով ներկայացնել: Ըստ նրա` պետք է իշխանությունը կոմպրոմիսի գնա ու երաշխիքներ տրամադրի հասարակությանը: Ա.Մանուկյանի կարծիքով` մի ընտրատեղամասում 2000 հոգու քվեարկությունը հնարավոր չի լինի ապահովել ժամկետի առումով: «Կոնսոլիդացիա, կոնսոլիդացիա… հասկացանք, ձեր կողքը կանգնած ենք, երբ սահմանին կռիվ կա, բայց դա չի նշանակում, որ ինչ բերեք, պիտի անցնի»,- ասաց Ա.Մանուկյանը` հավելելով, որ դեռ ժամանակ և ցանկություն կա ընդդիմության 5 կետերն օրենքի դրույթ դարձնելու համար: