«Կյանքի խոսքի» հավաքատեղիում դանակահարություն կատարածը թմրամիջոցի ազդեցության տա՞կ է եղել
«Կյանքի խոսք» կրոնական կազմակերպության՝ Թբիլիսյան խճուղում գտնվող հավաքատեղիում տեղի ունեցած դանակահարությունից տուժածը «Կյանքի խոսքի» հետևորդներից է եղել, իսկ նրան դանակահարած ազգականը՝ ոչ, Aysor.am-ին վստահեցրել է այդ կազմակերպության հովիվ Արմեն Լուսյանը։
Նա նշել է նաև, թե կան տեղեկություններ, որ դանակահարողը ինչ-որ բանի ազդեցության տակ է եղել.
«Չգիտենք՝ թմրադեղերի՞ ազդեցության տակ է եղել, թե՞ այլ բանի: Ինքը մեր եկեղեցու հաճախող չի, հետևորդ չի: Իսկ տուժած անձը նրա մորաքույրն է, այդտեղ են հանդիպել»:
Լուսյանի խոսքով՝ դեպքը տեղի է ունեցել «պաշտամունքի ժամին».
«Ականատեսները պատմել են, որ դանակահարել է ու արագ փախել: Տեղում ներկա բժիշկը առաջին օգնություն է ցույց տվել, հետո դանակահարված կինը տեղափոխվել է հիվանդանոց: Մեր տեղեկություններով՝ նրա կյանքին վտանգ չի սպառնում»:
Լուսյանի խսքով՝ իրենց էլ հայտնի չէ՝ ինչու է դանակահարողը ընտրել իրենց «Կյանքի խոսքի» տարածքը.
«Մենք դատապարտում ենք նման քայլը, մարդիկ ինչքա՜ն պետք է անցած լինեն կարմիր գծերը, որ հանցագործություն կատարելու համար ընտրեն եկեղեցական վայրերը»:
