Mango հագուստի խանութների ցանցի հիմնադրի մահը հետաքննվում է որպես սպանություն. լրատվամիջոցներ
Իսպանական Mango հագուստի խանութների ցանցի հիմնադիր Իսակ Անդիկի մահվան դատական հետաքննությունը դժբախտ պատահարի վարկածից փոխվել է ենթադրյալ սպանության, որի մեջ ներգրավված է նրա որդին՝ Ջոնաթանը: Այս մասին հաղորդում է Pais թերթը՝ հղում անելով աղբյուրներին։ Հիշեցնենք, որ Mango ընկերության հիմնադիրը մահացել է 2024 թվականի դեկտեմբերին՝ լեռնագնացության ժամանակ ընկնելով 150 մետր բարձրությունից:
«Մոնսերատի լեռներում մահացած Mango-ի հիմնադիր Իսակ Անդիկի մահվան դատական հետաքննությունը փոխել է ուղղությունը՝ դժբախտ պատահարի նախնական տեսությունից անցնելով հնարավոր սպանության կասկածի, որը Կատալոնիայի ոստիկանությունը (Mossos d’Esquadra) այժմ հետաքննում է: Գործարարի որդին՝ Ջոնաթան Անդիկը, միակ անձը, որը 2024 թվականի դեկտեմբերի 14-ի էքսկուրսիայի ժամանակ նրան ուղեկցել է, այժմ կասկածյալ է սպանության գործով»,- հաղորդում է հրատարակությունը։
Հաղորդվում է, որ հենց գործարարի որդու ցուցմունքներում առկա անհամապատասխանություններն են կասկածներ առաջացրել քննիչների մոտ։ Ողբերգությունից հետո առաջին շաբաթներին ոստիկանությունը միջադեպը որակել է որպես դժբախտ պատահար։ Սակայն վկաների բացակայությունը և կասկածները, որ երթուղու այդ հատվածը կարող էր վտանգավոր լինել, ստիպել են քննիչներին վերանայել իրենց նախնական եզրակացությունները և վերսկսել հետաքննությունը:
