Պուտինն անվտանգության խորհրդի անդամների հետ քննարկում է ԱՊՀ երկրների հետ գործակցությունը
Ռուսաստանի նախագահ Վլադիմիր Պուտինը Անվտանգության խորհրդի մշտական անդամների հետ խորհրդակցություն է անցկացնում՝ նվիրված ԱՊՀ տարածքում իրականացվող աշխատանքին։ Տեղեկությունը հայտնում է Կրեմլի մամլո ծառայությունը:
«Այսօր կքննարկենք մեր քաղաքականության կարևորագույն ուղղություններից մեկը՝ ԱՊՀ երկրների հետ փոխգործակցությունը։ Խոսքը վերաբերում է ԱՊՀ մի շարք երկրների հետ իրականացվող աշխատանքին և այդ ուղղությամբ առաջնահերթ խնդիրներին», – նշել է ՌԴ նախագահը։
Պուտինի խոսքով՝ նիստում կքննարկվեն ռազմավարական կարևոր նշանակություն ունեցող այս տարածաշրջանում Ռուսաստանի առաջիկա քայլերն ու նպատակները:
Հոկտեմբերի 10-ին Դուշանբեում տեղի կունենա ԱՊՀ անդամ պետությունների ղեկավարների գագաթնաժողովը, իսկ մինչ այդ` ԱՊՀ երկրների արտգործնախարարների խորհրդի նիստը։
