ՌԴ ԱԴԾ-ն գեներալ Մոսկալիկի սպանության գործով ևս մեկ տղամարդու է ձերբակալել
Ռուսաստանի անվտանգության դաշնության ծառայությունը Սարատովի մարզում ձերբակալել է ՌԴ ԶՈւ գլխավոր շտաբի գլխավոր օպերատիվ վարչության պետի տեղակալ, գեներալ-լեյտենանտ Յարոսլավ Մոսկալիկի՝ Ուկրաինայի հատուկ ծառայությունների կողմից կազմակերպված սպանության հանցակցին: Տեղեկությունը հայտնում է ԱԴԾ–ն։
Ձերբակալվածը 1976 թվականին ծնված տղամարդ է, ՌԴ քաղաքացի։
Պարզվել է, որ նա Մոսկվայի մարզ է հասցրել ինքնաշեն պայթուցիկ սարքը, որն օգտագործվել է 2025 թվականի ապրիլի 25-ին Բալաշիխայում տեղի ունեցած ահաբեկչության ժամանակ, որի հետևանքով զոհվել է գեներալ Մոսկալիկը։ Բացի այդ, նա ուկրաինական կողմին տեղեկություններ է փոխանցել Ռուսաստանի օդատիեզերական ուժերի զինծառայողների, պաշտպանական ձեռնարկությունների ղեկավարների և աշխատակիցների, ինչպես նաև Սարատովի մարզում կրիտիկական և տրանսպորտային ենթակառուցվածքների օբյեկտների մասին:
ԱԴԾ-ի տվյալներով՝ 2023 թվականի հուլիսին տղամարդը WhatsApp մեսենջերի միջոցով ինքնուրույն կապի է դուրս եկել ուկրաինական հետախուզության աշխատակցի հետ և համաձայնել է դրամական պարգևի դիմաց համագործակցել և Ռուսաստանի անվտանգության դեմ ուղղված գործողություններ իրականացնել։
ԱԴԾ-ի Սարատովի մարզի վարչության քննչական բաժնում քրեական գործ է հարուցվել կազմակերպված խմբի կողմից ահաբեկչության կատարմանն օժանդակելու և պայթուցիկ նյութեր կամ պայթուցիկ սարքեր ապօրինի իրացնելու հոդվածներով: Դատարանը խափանման միջոց է ընտրել կալանավորումը: Ստուգում է իրականացվում նաև նրա գործողությունները պետական դավաճանություն որակելու համար:
ԱԴԾ-ն հիշեցրել է, որ ուկրաինական հատուկ ծառայությունները ռուսաստանցիներին դիվերսիոն-ահաբեկչական գործունեության մեջ ներգրավելու համար ակտիվորեն օգտագործում են ինտերնետը, սոցիալական ցանցերը և մեսենջերները:
«Հավաքագրողները նրանց ներքաշում են ծանր հանցագործությունների կատարման մեջ, որոնց համար նախատեսված են ազատազրկման երկարատև ժամկետներ»,-ընդգծել են գերատեսչությունում:
Գեներալ-լեյտենանտ Յարոսլավ Մոսկալիկը զոհվել է ապրիլի 25-ին Բալաշիխայում ավտոմեքենայի պայթյունի հետևանքով: Մոսկվայի Բասմանի դատարանի որոշմամբ` կալանավորվել է Իգնատ Կուզինը, որը մեղադրվում է ահաբեկչություն իրականացնելու մեջ: ՌԴ քննչական կոմիտեի տվյալներով՝ նա Ռուսաստան է մեկնել 2023 թվականի սեպտեմբերին և բնակություն հաստատել Մոսկվայի մարզում՝ սպասելով Ուկրաինայի անվտանգության ծառայության համակարգողի ցուցումներին։ Հանցագործության համար նրան խոստացել էին 18 հազար դոլար վճարել։
