Իմ տանը վերջին 3 տարիներին անգամ տոնածառ չի զարդարվում. երեխաներիս քեռին անհետ կորած է.Դավիթ Գալստյան
«Սրբազան պայքարի» գործով անցնող Արցախի Հանրապետության Ազգային ժողովի պատգամավոր, «Արդարություն» խմբակցության ղեկավար Դավիթ Գալստյանի կալանքի ժամկետը ևս 3 ամսով երկարաձգվեց։ Նման որոշում կայացրեց այսօր դատավոր Կարեն Ֆարխոյանը։
Մինչ այդ Գալստյանն ու իր պաշտպանը նշում էին, որ Դավիթ Գալստյանը՝ որպես Արցախի պատգամավոր, արցախցիների սոցիալական կարիքների մասին բարձրաձայնելու համար մասնակցել է տարբեր հավաքների, ունեցել է տարբեր հանդիպումներ, բայց ահաբեկչություն իրականացնելու կամ իշխանություն զավթելու մտադրություն երբևէ չի ունեցել։
«Պատվարժան դատարան, այս գործի պատվիրատուներն էս մարդուց հայրենիք են խլել, հիմա էլ ուզում են, որ Ձեր ձեռքերով ազատությունը խլեն։ Սա վաղուց արդեն իրավական քննարկումների հարց չէ, սա պարզ ընտրության հարց է։ Դուք Ձեզ ուզու՞մ եք տեսնել այդ մարսկանց շարքում, թե ոչ»,- դիմելով դատավոր Ֆարխոյանին՝ ասաց պաշտպան Հովհաննես Խուդոյանը։
Դատավոր Ֆարխոյանը նախազգուշացրեց՝ հետայսու եթե որևէ մեկը նման արտահայտություններ ասի դատարանի հասցեին, դրանք կդիտվեն որպես վիրավորական՝ դրանից բխող հետևանքներով։
Դավիթ Գալստյանը դիմեց դատարանին՝ նշելով, որ իր նկատմամբ խափանման միջոցը որոշելիս դատավորը հաշվի առնի, որ ինքը պետք է կարողանա աշխատել՝ ընտանիքի կարիքները հոգալու համար, ուստի տնային կալանքն իր համար անընդունելի է։
«Ինչ վերաբերում է պայթուցիկներին և այլն, ես համոզված եմ, որ մեղադրող կողմը երեխայի ծնունդի ու Ամանորի հրավառություն է անում, իսկ մեր տանը 2020 թվականից մինչև հիմա անգամ տոնածառ չենք զարդարում, քանի որ երեխաներիս քեռին անհետ կորած է։ Իմ վերջին գնած պայթուցիկը կրակայրիչն է, եթե դա համարվում է ահաբեկչություն կազմակերպելու իր, ապա մտածում եմ՝ մենք տեղերով պիտի փոխվենք մեղադրողի հետ»,- ասաց նա։
