Վլադիմիր Գասպարյանին ճանաչել մեղավոր և ազատել քրեական պատասխանատվությունից վաղեմության ժամկետներն անցնելու ու համաներման հիմքով. դատավոր Վարդգես Սարգսյանը հրապարակեց վճիռը
Այսօր Հակակոռուպցիոն դատարանում՝ դատավոր Վարդգես Սարգսյանի նախագահությամբ, հրապարակվեց ՀՀ Ոստիկանության նախկին պետ Վլադիմիր Գասպարյանի, փոխոստիկանապետ Լևոն Երանոսյանի և գործով անցնող այլ անձանց վերաբերյալ դատարանի վճիռը:
Հիշեցնենք, որ ըստ իրավապահների՝ 1997-2011թթ. Վլադիմիր Գասպարյանը Ռազմական ոստիկանության վարչության պետի, ապա՝ պաշտպանության նախարարի տեղակալի պաշտոններում մի քանի զինծառայողի թույլ է տվել իրենց պարտականությունները կատարելու փոխարեն՝ այլ աշխատանքով զբաղվել:
Նրանց գնահատմամբ, այդ ապօրինի ծառայությունների դիմաց զինծառայողները պետբյուջեից ընդհանուր առմամբ ստացել են 54 միլիոն դրամ աշխատավարձ:
Գասպարյանը մեղադրվում է նաև 2011-2018թթ. Ոստիկանության պետի պաշտոնում Ոստիկանության հաշվեկշռում գտնվող 15 միլիոն և 10 միլիոն դրամ արժողությամբ անշարժ գույքերը սեփականության իրավունքով Ոստիկանության ծառայողներին, այդ թվում՝ իր դստեր պրոդյուսերին հատկացնելու համար:
Այսօր դատարանի վճռով Վլադիմիր Գասպարյանը մեղավոր ճանաչվեց երկու դրվագով, սակայն քրեական պատասխանատվությունից ազատվեց այդ հանցագործության համար վաղեմության ժամկետների լրանալու հիմքով:
Եվս երկու դրվագով նախկին ոստիկանապետի համար պատիժ սահմանվեց՝ ազատազրկում 5-ական տարի ժամկետով, բայց հաշվարկի արդյունքում՝ պատիժները մասնակի գումարելով՝ վերջնական պատիժ սահմանվեց 6 տարի ազատազրկումը, որը, սակայն, Վլադիմիր Գասպարյանը չի կրի՝ համաներում կիրառելու հիմքով պատժից ազատ արձակվելու հանգամանքով պայմանավորված:
Ոստիկանության նախկին պետի նկատմամբ ընտրված խափանման միջոցը՝ ստորագրությունը չհեռանալու մասին, մնաց անփոփոխ՝ մինչև դատավճռի օրինական ուժի մեջ մտնելը: Որպես դատական ծախս՝ Վլադիմիր Գասպարյանը կվճարի 200.000 դրամ գումար:
Փոխոստիկանապետ Լևոն Երանոսյանը ևս մեղավոր ճանաչվեց 2 դրվագով, սակայն նույնպես ազատ արձակվեց՝ վաղեմության ժամկետները լրանալու հիմքով: Մեկ այլ դրվագով էլ նրա նկատմամբ պատիժ նշանակվեց արդեն իսկ 5 տարի ժամկետով ազատազրկման չափով, սակայն կրկին համաներմամբ ազատ արձակվեց:
Նկատենք, որ թե՛ Վլադիմիր Գասպարյանը, թե՛ Լևոն Երանոսյանը դատարանում իրենց մեղքը չեն ընդունել:
Մանրամասները՝ տեսանյութում:
