Ինքնակամ լքել է զորամասը և ավազակային հարձակում կատարել
Լոռու մարզի ընդհանուր իրավասության դատարանում քննվում է ՀՀ ՊՆ N զորամասի զինծառայող, նռնակաձիգի օգնական, շարքային Գոռ Քոչարյանի նկատմամբ հարուցված քրեական գործը, ով մեղադրվում է կողոպուտի, ավազակային հարձակում կատարելու մեջ:
Ըստ նախաքննական մարմնի, Գ.Քոչարյանը, 2012թ. մարտին, ներկայանալով իբրև մտերիմ անձ, մուտք է գործել Ս.Հովհաննիսյանի տուն, վերջինիս առողջության համար ոչ վտանգավոր բռնություն գործադրելով կապել ձեռքերը, որից հետո հափշտակել է ոսկե շղթան ու կախազարդը, ապա դիմել է փախուստի։
Գ.Քոչարյանին առաջադված մեղադրանքից նաև տեղեկանում ենք,որ 2012թ.ապրիլի 04-ին, շարքայինը ինքնակամ լքել է զորամասը, մեկնել Վանաձոր և, օգտվելով մուտքի դռան բաց լինելու հանգամանքից, ներս է մտել Ա.Գրիգորյանի բնակարան, կտրող-ծակող առարկայի գործադրմամբ, առողջության համար վտանգավոր բռնություն գործադրելու սպառնալիքներով հարձակվել է տան տիրուհու վրա, կտրող-ծակող առարկայով նրա առողջությանը պատճառել է վնաս և հափշտակել «HP» տեսակի նոթբուք համակարգիչ, «Սամսունգ» տեսակի բջջային հեռախոս և 1.000 ՀՀ թղթադրամ։
Գ.Քոչարյանին մեղադրանք է առաջադրվել ՀՀ քրեական օրենսգրքի 175-րդ հոդվածի 2 -րդ մաս 3,4-րդ կետերով, 361-րդ հոդվածի 1-ին մասի և 176-րդ հոդվածի 3-րդ մասի 1.1 կետով Նրա նկատմամբ որպես խափանման միջոց է ընտրվել կալանավորումը:
