Երջանիկ Աբգարյանը «մի քիչ սառը» ջուր է լցնում Րաֆֆի Հովհաննիսյանի կողմնակիցների ակնկալիքների վրա
ՀՀՇ նախկին անդամ Երջանիկ Աբգարյանը ֆեյսբուքի իր էջում գրել է.
«Մի քիչ սառը ջուր՝ Երեւանի ավագանու ընտրություններում Րաֆֆու կողմնակիցների ակնկալիքների վրա: Եթե նրա կողմնակիցները կարծում են, որ մասնակցելով այդ ընտրություններին՝ նույնաչափ արդյունքներ կունենան, ինչքան նախագահական ընտրություններում էր, ապա չարաչար սխալվում են: Ժամանակին Թալինը ցույց տվեց «Ժառանգության» օգտին քվեարկողների իրական թվին մոտ մի ցուցանիշ: Դա չփոխվեց ոչ նախագահական ընտրությունների ժամանակ, ոչ էլ կփոխվի երեւանյան առաջիկա ընտրություններում: Այո, եթե նույնիսկ նախագահական ընտրություններում համարենք, որ Րաֆֆին հավաքել է ոչ թե 37 տոկոս, այլ, ասենք, 50 տոկոս, ապա այդ թվի մեջ նրա իրական կողմնակիցների ձայները էլի չեն գերազանցել երեք տոկոսը: Հարցն այն է, որ նախագահական ընտրություններում թեկնածություն չդրած քաղաքական ուժերի կողմնակիցների մեծագույն մասը, ցանկանալով փորձել ամեն գնով ազատվել Սերժիկից, իր քվեն տվեց Րաֆֆուն: Իսկ ահա մայիսյան ընտրություններին մասնակցելու են բոլոր ընդդիմադիր ուժերը եւ նույնիսկ նրանց «առանցք» դառնալու հավակնություն ունեցող, բայց եւ «կոալիցիոն» զեղումներից չհրաժարված «այլընտրանք» փիլոնակիրը: Այս պայմաններում Րաֆֆին եւ իր կողմնակիցները պետք է հրաժարվեին մասնակցել այդ ընտրություններին, որոնք կարող են խայտառակել «Ժառանգությանն» ու նրա լիդերին եւ դառնալ ավելի կարեւոր գործը տապալելու առիթ»:
