Առանձնապես խոշոր չափերի թմրամիջոց ներկրելու և իրացնելու կասկածանքով ձերբակալվել են երևանցի երիտասարդներ
Կապանի Երկաթուղայինների 5-րդ նրբանցքում hունվարի 11-ին ժամը 16.50-ին մաքսանենգ ճանապարհով առանձնապես խոշոր չափերի թմրամիջոցներ ներկրելու և իրացնելու կասկածանքով ձերբակալվել են Երևանցի 28 և 29 տարեկան երիտասարդներ։ «Արմենպրես»-ի փոխանցմամբ՝ այս մասին հայտնում եմ ՀՀ ներքին գործերի նախարարությունից, նշելով, որ վերոնշյալ երիտասարդներն իրենց «Քրայսլեր» մակնիշի ավտոմեքենայով հանդերձ տեղափոխվել են ոստիկանության Կապանի բաժին:
Մեքենայի սրահում հայտնաբերված պոլիէթիլենային երեք փաթեթում կային 11 կգ 840 գրամ տարբեր տեսակի թմրամիջոցներ, այդ թվում՝ 4 կգ 846 գրամ մեթամֆետամինի, 6 կգ 289 գրամ մարիխուանայի, 202 գրամ հերոինի և 503 գրամ ափիոնի նմանվող զանգվածներ:
Փաստի առթիվ Սյունիքի մարզային քննչական վարչությունում նախաձեռնվել է քրեական վարույթ:
Հանգամանքները պարզվում են:
