Քաղաքացին պնդում է՝ Հյուսիսային պողոտայում թուրքեր է տեսել. Ոստիկանությունը հերքում է. փաստաթղթերը ստուգել են, թուրքեր չեն
Երեկ ֆեյսբուքյան օգտատեր Մասիս Փարոսը ֆեյսբուքյան իր էջում գրել էր.
«Հենց նոր, Երևանի կենտրոնում երեք թուրք տղամարդ եմ բռնել տվել։ Հյուսիսային պողոտայում հավաքվել, բարձրաձայն խոսում էին թուրքերեն։ Մի քանի րոպե հետևեցի, ականջ դրեցի, համոզվելու համար, որ թուրք են։ Նրանցից մեկը զանգահարեց և սկսեց թուրքերեն զրուցել հեռախոսով, բարձրաձայն ծիծաղել։ Այդ պահին լսեցի, ինչպես զրուցակցին ասաց՝ «Էրմենիստան բիզիմդիր» արտահայտությունը։ Մոտակայքում ոստիկանական ավտոմեքենա նկատեցի։ Արագ գնացի դեպի մեքենան, հանձնարարեցի բռնել թուրքերին, ստուգել նրանց ինքնությունը, շատ հնարավոր է, որ զինված էին։ Առաջին ոստիկանը միանգամից գնաց դեպի թուրքերը, երկրորդը շարունակում էր նստած մնալ մեքենայի մեջ։ Ես նրան էլ պարտադրեցի գնալ ծառայակցի ետևից, քանի որ մենակ չէր կարողանա երեքին բռնել։ Փաստաթղթերը ստուգելուց հետո, երեք թուրքին էլ տարան դեպի ոստիկանական ավտոմեքենան։ Ձերբակալեցին ու տարան։ Հիմա տեսնենք պաշտոնական ԶԼՄ-ները կասե՞ն այդ մասին, թե՞ կթաքցնեն իրականությունը»։
168.am-ը դիմեց ՀՀ ՆԳՆ Ոստիկանության լրատվական ծառայություն՝ ճշտելու համար՝ արդյո՞ք տեղեկությունը համապատասխանում է իրականությանը, և ովքե՞ր են եղել բերման ենթարկված անձինք:
«Այո՛, երեկ Հյուսիսային պողոտայում պարեկները ստուգել են երեք օտարերկրացու փաստաթղթեր, պարզվել է, որ Իրաքի քաղաքացի զբոսաշրջիկներ են»,- ասացին Ոստիկանությունից:
