Թուրքիան ֆինանսավորում է Մառնեուլիի ռազմական օդանավակայանի արդիականացումը
Ադրբեջանական Trend լրատվական գործակալության փոխանցմամբ՝ Վրաստանի խորհրդարանի պաշտպանության ու անվտանգության հանձնաժողովը դիտարկել է Վրաստանի նախագահի կողմից վավերացման նպատակով ներկայացրած փաստաթղթերը:
Դրանց թվում են ընդգրկվել նաև Վրաստանի ու Թուրքիայի միջև ռազմական-ֆինանսական ոլորտում համագործակցության մասին համաձայնագիրը և Վրաստանի ու Թուրքիայի կառավարությունների միջև ֆինանսական օգնության մասին համաձայնագիրը:
Այդ փաստաթղթերի համաձայն Թուրքիան 900.000 լիրա (ավելի քան 510.000 դոլար) է հատկացնելու Վրաստանին՝ ռազմական նպատակներով ապրանքների ու ծառայությունների գնման և Մառնեուլիի օդանավակայանի արդիականացման համար: Այս մասին հայտնել է խորհրդարանի մամուլի ծառայությունը: Վերջինիս հաղորդմամբ՝ հանձնաժողովը հավանության է արժանացրել ներկայացված համաձայնագրերի վավերացումը:
Հիշեցնենք, որ Մառնեուլիում է գտնվում Վրաստանի ռազմաօդային ուժերի բազան:
