Ցուցարարները ցանկանում են Սաակաշվիլին անցկացնել «ամոթի միջանցքի» միջով
![](https://168.am/wp-content/uploads/2013/02/763613496.jpg)
Ռուսական РИА Новости լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլիի հրաժարականը պահանջող ակցիայի մասնակիցները Թբիլիսիում գտնվող Ազգային գրադարանի շենքի առջև կազմակերպել են յուրօրինակ «ամոթի միջանցք»:
Դա կապված է նրա հետ, որ այն բանից հետո, ինչ Վրաստանի խորհրդարանը հրաժարվեց լսել նախագահի տարեկան զեկույցը, Սաակաշվիլին հայտարարեց, որ այդ զեկուցումով, խորհրդարանի փոխարեն, հանդես կգա Ազգային գրադարանում: Դա տեղի է ունենալու այսօր երեկոյան:
Այս պահին Ազգային գրադարանի շենքի մոտ է հավաքվել մի քանի տասնյակ ցուցարար, որոնք մասնավորապես տարբեր հասարակական կազմակերպությունների ներկայացուցիչներ են և համաներմամբ ազատված քաղբանտարկյալներ: Նրանք հայտարարել են, որ թույլ չեն տա, որ Սաակաշվիլին հանգիստ տեղաշարժվի և հանգիստ ելույթ ունենա ժողովրդի առջև:
Նրանք պնդում են, որ Սաակաշվիլին պետք է անցնի հենց այդ «ամոթի միջանցքով»: Չնայած բողոքի ակցիային՝ Սաակաշվիլին հայտարարել է, որ մտադիր չէ հրաժարվել ելույթ ունենալուց:
Ակցիայի մասնակիցները հիշեցնում են, որ Սաակաշվիլին երկրորդ անգամ նախագահ է դարձել 2008 թվականի հունվարի 20-ին, հետևաբար նրա նախագահության ժամկետը սպառվել է այս տարվա հունվարի 20-ին, և նա պետք է հրաժարական տա: Մինչդեռ ավելի վաղ կատարված սահմանադրական ուղղումների համաձայն, Վրաստանում նախագահական ընտրությունները պետք է անցկացվեն հոկտեմբերին: