Մեկ մեդալ` Սամբոյի ուսանողական գավաթի խաղարկությունից

Նոյեմբերի 30-ից դեկտեմբերի 2-ը Ռուսաստանի Դաշնության Կազան քաղաքի «Ակ Բարս» մարզահամալիրում անցկացվեց Սամբոյի աշխարհի գավաթի խաղարկությունն ուսանողների միջև, որին մասնակցում էր շուրջ 200 մարզիկ աշխարհի 41 երկրից:

Մրցաշարին Հայաստանի Հանրապետությունից մասնակցեցին Գյումրիի մանկավարժական ինստիտուտի առաջին կուրսի ուսանող, Սամբոյի 2012թ. Աշխարհի և Եվրոպայի պատանեկան առաջնությունների չեմպիոն Գոռ Մայիլյանը և Ֆիզիկական կուլտուրայի պետական ինստիտուտի Վանաձորի մասնաճյուղի առաջին կուրսի ուսանող, Սամբոյի Աշխարհի և Եվրոպայի 2012թ. առաջնությունների բրոնզե մեդալակիր Տիգրան Կիրակոսյանը:

Ցավոք, Գոռը, ում Հայաստանի սամբոյի ֆեդերացիան գործուղել էր մինչ 57 կգ քաշայինների մրցապայքարին մասնակցելու համար, ավել քաշի պատճառով մրցապայքարի մեջ մտավ մինչև 62 կգ քաշայինների կարգում և եզրափակիչ մտնելու համար պայքարը տանուլ տալով, գրավեց 5-րդ տեղը,  իսկ Տիգրանը մեկ պարտությունից հետո հաղթելով հետագա գոտեմարտերում արժանացավ բրոնզե մեդալի և մինչև 52 կգ քաշային կարգում գրավեց 3-րդ տեղը:

Նշենք, որ 2013-ին տեղի կունենա Սամբոյի համաշխարհային ունիվերսիադան, փոխանցում է Սամբոյի ֆեդերացիայի պաշտոնական կայքը:

Մարզական լրահոսն ապահովում է SportArmenia.com-ը