«Ընտրողները տաքսիներով են գալիս, ինչը կարող է նշանակել, որ ընտրողներին ծառայություն են մատուցում». Իոաննիսյան
«Կուտակումները 2017 թվականի ընտրությունների համեմատությամբ քիչ են»,- այս մասին քիչ առաջ ասաց «Իրազեկ քաղաքացիների միավորում» խորհրդատվական հասարակական կազմակերպության ծրագրերի համակարգող Դանիել Իոաննիսյանը` ներկայացնելով 7/30 և 7/31 ընտրատեղամասերում արձանագրված հիմնական ընտրախախտումը:
Նա տեղեկացրեց, որ ահազանգ կար, թե կա կուտակում, քվեախցիկների դիրքն այնպիսին էր, որ ընտրողների քվեարկության գաղտնիությունն ամբողջովին ապահովված չէր, տեղամասերից մեկի տեսախցիկները սխալ ուղղությամբ էին:
Բայց, նրա խոսքով, երկրորդ և երրորդ խնդիրները լուծվել են: «Կապված կուտակումների հետ, ընտրողների հոսքն անընդհատ շարունակվում է, և իսկապես տեղամասերից մեկում ընտրողների հերթեր են: Ըստ էության այն, ինչ մենք տեսնում ենք, ընտրողները պարբերաբար տաքսիներով գալիս են, ինչը կարող է նշանակել, որ ընտրողներին իրականում ծառայություն են մատուցում և ընտրողներին բերում են: Բայց միկրոավտոբուսներ և մեծ տրանսպորտային միջոցներ չենք տեսել»,- ասաց Իոաննիսյանը:
Նա նշեց, որ առայժմ Ոստիկանությանը հաղորդում չի ներկայացվել: Նրա խոսքով, առայժմ դիտարկում են անում, մոբայլ խմբերից մեկը հետևում է տաքսիների պահվածքին, որպեսզի հասկանա` արդյոք առկա՞ է ընտրախախտում, թե՞ ոչ:
«Կուտակումների հետ կապված՝ տեղամասի նախագահին ասացինք, հանձնաժողովի նախագահը մասամբ փորձեց լուծել խնդիրը, բայց այդուհանդերձ տեղամասի ներսում կուտակումների ականատես ենք լինում: Սա մասամբ արդյունք է այն հանգամանքի, որ, ըստ էության, մեկ դահլիճի տարածքում երկու տեղամասը նպաստում է խառնաշփոթին»,- ասաց նա:
Իոաննիսյանը տեղեկացրեց, որ «Անկախ դիտորդ» դաշինքը 300 տեղամասերում դիտարկում է անում և 40 մոբայլ խմբերով շրջում է հանրապետությունում:
«Ըստ էության հիմնական խնդիրները, որ մենք տեսել ենք, կայանում է նրանում, որ որոշ տեղերում հանձնաժողովի անդամները, նախագահները պատշաճ չեն տիրապետում Ընտրական օրենսգրքին, որոշ տեղերում փորձել են կոնֆլիկտի գնալ դիտորդների հետ, դիտորդները փորձել են առկա խնդիրը հանձնաժողովի նախագահին ներկայացնել, տեղամաս է եղել, որտեղ հանձնաժողովի անդամը ոչ սթափ վիճակում է եղել, և իր վրայից ալկոհոլի հոտ էր գալիս: Տեղամասեր են եղել, որ այս կամ այն քաղաքական ուժի քվեաթերթիկներն են տարօրինակորեն պակասել:
Ահազանգ կա, որ 2 տեղամասերում` Աբովյանում, էլեկտրոնային գրանցման սարքերը չեն աշխատել, և կուտակումներ են եղել: Կուտակումները բավականին շատ են: 2017 թվականի ընտրություններից անհամեմատ քիչ են, բայց այնուհանդերձ տեսնում ենք, ու այդ թվում՝ կազմակերպված կուտակումներ: Մի ահազանգ ունենք, որ միկրոավտոբուսով են ընտրողներին բերել, բայց դա մեկ դեպք է, հետո այդ միկրոավտոբուսը չի երևացել: Բայց կազմակերպված կուտակումների մասին ահազանգեր կան»,- ներկայացրեց Դանիել Իոաննիսյանը:
