Յունիբանկը համակարգչային դասասենյակներ նվիրեց սահմանամերձ դպրոցներին
Սեպտեմբերի 1-ին Ճամբարակի և Բերդավանի սահմանամերձ երկու դպրոցներում տոնական միջոցառումներին ներկա էին նաև Յունիբանկի ներկայացուցիչները: Գիտելիքի օրվան նվիրված միջոցառումներին տեղի ունեցավ Յունիբանկի աջակցությամբ ստեղծված համակարգչային դասասենյակների բացման հանդիսավոր արարողությունը:
«Դասասենյակները հիմնովին վերանորոգված, կահավորված և հագեցված են ժամանակակից տեխնիկայով` համակարգիչներ, ինտերակտիվ գրատախտակ, հարմարավետ դպրոցական կահույք, ծրագրային ապահովում, – նշեց Ճամբարակի N3 դպորցի տնօրեն Կարինե Գրիգորյանը: – Մենք շատ ուրախ ենք, որ բանկի ներկայացուցիչները անտարբեր չեն երեխաների կրթության զարգացման և որակի նկատմամբ»:
Յունիբանկը Ճամբարակի և Բերդավանի երկու դպրոցների բոլոր 600 աշակերտներին նվիրեց նաև դպրոցական պարագաների փաթեթներ: Աշակերտների համար կար ևս մեկ անակնկալ` բանկի ներկայացուցիչներն անցկացրեցին վիկտորինա և հաղթող երկու աշակերտներին ևս հանձնեցին համակարգիչներ:
«Մենք շնորհակալ ենք Յունիբանկին ուսումնական գործընթացին օժանդակելու համար, – նշեց Բերդավանի միջնակարգ դպրոցի տնօրեն Արևիկ Ասատրյանը: Երեխաների համար կարևոր է օգտվել ժամանակակից տեխնիկայի հնարավորություններից, ինչը այժմ հնարավոր է, մեր հովանավորի շնորհիվ»:
Սա առաջին դեպքը չէ, երբ բանկն օգնում է դպրոցներին : Կրթության բարելավման ծրագրի շրջանակներում, համակարգչային դասասենյակ արդեն իսկ բացվել է Գյումրու դպրոցներից մեկում: Մի քանի օրից բանկի աջակցությամբ «Արմաթ» լաբորատորիաներ կբացվեն Արցախի երկու դպրոցներում:
«Մեր ծրագիրը երկարաժամկետ է, և դրանում արդեն ներառվել են այլ դպրոցներ, որոնք ևս ունեն համակարգչային տեխնիկայի կարիք, – նշեց Յունիբանկի Վարչության նախագահ Մեսրոպ Հակոբյանը: – Դպրոցների տեխնիկական հագեցվածությունը պետք է համապատասխանի ժամանակակից պահանջներին: Մենք շարունակելու ենք աջակցել կրթական հաստատություններին, հատկապես` սահմանամերձ դպրոցներին»:
