«Ռոսատոմը» ՀՀ-ից պատասխան չի ստացել Մեծամորի ԱԷԿ-ի հետագա շահագործման վերաբերյալ. Լիխաչով
«Ռոսատոմը» հայկական կողմից վերջնական պատասխան չի ստացել Մեծամորի ԱԷԿ-ի ատոմային էներգաբլոկի հետագա շահագործման հարցով։ Այս մասին «Известия»-ին տված հարցազրույցում հայտարարել է պետական կորպորացիայի ղեկավար Ալեքսեյ Լիխաչովը։
«Առայժմ մենք հայկական կողմից վերջնական պատասխան չենք ստացել»,- ասել է Լիխաչովը։
Նա նշել է, որ չէր ցանկանա, որ Մեծամորի ԱԷԿ-ի ատոմային էներգաբլոկի շահագործման հարցը տեղափոխվի քաղաքական քննարկումների հարթություն:
Հիշեցնենք, որ Հայաստանի իշխանությունները նոր ատոմակայանի կառուցման շուրջ բանակցություններ են վարում Ռուսաստանից, ԱՄՆ-ից, Ֆրանսիայից, Չինաստանից և Հարավային Կորեայից հնարավոր գործընկերների հետ։
Երևանում ԱՄՆ փոխնախագահ Ջեյմս Դևիդ Վենսի հետ հանդիպման ժամանակ ՀՀ վարչապետը հայտնել էր մոդուլային ԱԷԿ-ի նախագծի շուրջ ձեռք բերված պայմանավորվածությունների մասին։ Բանակցությունների արդյունքում ստորագրվել էին ատոմային էներգետիկայի ոլորտում համագործակցության մասին համաձայնագրեր։
Դրան զուգահեռ, ռուսական կողմի հետ արդեն մեկնարկել են գործող ԱԷԿ-ի շահագործման ժամկետը մինչև 2036 թվականը երկարաձգելու աշխատանքները։ Համապատասխան համաձայնագիրը 2023 թվականին ստորագրել են Հայկական ԱԷԿ-ը և «Ռոսատոմ Սերվիս» ընկերությունը։ Փաշինյանը չէր բացառել նաև գործող էներգաբլոկի աշխատանքը մինչև 2046 թվականը երկարաձգելու հնարավորությունը։
