Իրանում շարունակվող հակամարտությունը զգալի ռիսկեր է ստեղծում համաշխարհային սննդամթերքի գների աճի համար. ԱՄՀ
Իրանում շարունակվող հակամարտությունը զգալի ռիսկեր է ստեղծում համաշխարհային սննդամթերքի գների աճի համար, և պարարտանյութերի մատակարարման խափանումները կարող են վատթարացնել իրավիճակը, ըստ Reuters-ի՝ հայտարարել է Արժույթի միջազգային հիմնադրամի (ԱՄՀ) պաշտոնական ներկայացուցիչ Ջուլի Կոզակը։
Ըստ նրա՝ էներգիայի և պարարտանյութերի մատակարարման խափանումները, մասնավորապես՝ ռազմավարական նշանակություն ունեցող Հորմուզի նեղուցի միջոցով, արդեն ճնշում են գործադրում համաշխարհային շուկաների վրա, և նավթի ու գազի երկարատև բարձր գները կարող են հանգեցնել համաշխարհային գնաճի և մի շարք երկրներում տնտեսական աճի նվազման։
Կոզակը հավելել է, որ Արժույթի միջազգային հիմնադրամն ուշի-ուշով հետևում է իրավիճակին և ապրիլին ԱՄՀ-ի և Համաշխարհային բանկի գարնանային հանդիպումներում իր զեկույցները թարմացնելիս հաշվի կառնի հակամարտության ազդեցությունը համաշխարհային տնտեսական կանխատեսումների վրա։
