Մեծ յոթնյակի երկրները կքննարկեն ռազմավարական պահուստներից նավթի ազատման հնարավորությունը․ FT
«Մեծ յոթնյակի» (G7) երկրների ֆինանսների նախարարներն առաջիկա օրերին արտահերթ նիստ կանցկացնեն՝ ռազմավարական պահուստներից նավթի համակարգված իրացման հնարավորությունը քննարկելու համար, որն իրականացվելու է Էներգետիկայի միջազգային գործակալության (ԷՄԳ) հովանու ներքո։ Այս մասին գրում է Financial Times-ը՝ հղում անելով հանդիպման նախապատրաստական աշխատանքներին մոտ կանգնած աղբյուրներին։
Այս նախաձեռնությունը քննարկվում է համաշխարհային շուկայում նավթի գների կտրուկ աճի ֆոնին, որն առաջացել է Իրանի շուրջ ընթացող պատերազմի հետևանքով։ Վերջինս մատակարարումների ընդհատման է հանգեցրել՝ հատկապես ռազմավարական նշանակություն ունեցող Հորմուզի նեղուցում։ Brent տեսակի նավթի գինը կարճ ժամանակով մեկ բարելի համար հասել է գրեթե 120 դոլարի, ինչն էլ ավելի է մեծացրել գնաճի և համաշխարհային տնտեսական աճի սպառնալիքների վերաբերյալ մտահոգությունները։։
Ըստ FT-ի տվյալների՝ G7-ի հանդիպմանը, որին կմասնակցի նաև ԷՄԳ-ի ղեկավար Ֆատիհ Բիրոլը, կարող են քննարկվել 300-ից 400 միլիոն բարել նավթի իրացման առաջարկներ։ Սա կազմում է գործակալության անդամ երկրների 1,2 միլիարդ բարել ընդհանուր ռազմավարական պաշարների մոտ 25-30%-ը։
G7-ի երեք երկրներ, այդ թվում՝ ԱՄՆ-ն, արդեն իսկ իրենց աջակցությունն են հայտնել այս գաղափարին՝ ընդգծելով համաշխարհային էներգետիկ շուկաները հետագա ցնցումներից պաշտպանելու անհրաժեշտությունը։
Պահուստների իրացման վերաբերյալ վերջնական որոշում դեռևս չի կայացվել. G7-ի մակարդակով ֆինանսների նախարարների քննարկումից հետո սպասվում է էներգետիկայի նախարարների հանդիպումը, որն էլ վերջնականապես կհստակեցնի հնարավոր համակարգման ծավալներն ու ժամկետները։ Հաստատման դեպքում սա կդառնա վերջին տարիների ընթացքում ԷՄԳ-ի պահուստների հետ կապված խոշորագույն համատեղ գործողություններից մեկը և համադրելի կլինի 2022 թվականին ռուս-ուկրաինական պատերազմի մեկնարկից հետո շուկայի կայունացմանն ուղղված քայլերի հետ։
