Ազատել եմ համակարգում աշխատող այն ծնողներին, ովքեր ունեն այլ երկրի քաղաքացի զավակներ․ Պապիկյան
Գաղտնիք չէ, որ մեր հասարակության մեջ արմատավորված մի վատ ավանդույթ կա․ յուրաքանչյուր «պատվախնդիր» ծնող ամեն ինչ անում է, կաշվից դուրս է գալիս, ամեն խարդախության մեջ պատրաստ է մտնել, որպեսզի արու զավակին ազատի զինծառայությունից, լրագրողների հետ հանդիպման ժամանակ ասաց ՀՀ պաշտպանության նախարար Սուրեն Պապիկյանը։
Նրա խոսքով՝ որոշ ժամանակ այս երևույթը նույնիսկ ընկալվել է որպես սոցիալական կարգավիճակի մասին հայտարարություն։
«Սա համարում եմ ամենախայտառակ բանը, որ մեր հասարակության մեջ առկա է»,- ասաց Պապիկյանը։
Նախարարը տեղեկացրեց, որ վերջին մեկ տարվա ընթացքում աշխատանքից ազատել է ՊՆ համակարգում աշխատող բոլոր այն ծնողներին, որոնց զավակներն ունեն այլ երկրի քաղաքացիություն։
«Անմեղության կանխավարկածը հաշվի առնելով՝ դա չեմ կարող տարածել «հիվանդություն» ունեցողների նկատմամբ, բայց ամեն դեպքում կասկածի որդը շարունակում է ինձ ճնշել, որպեսզի նրանց նկատմամբ նույնպես ուշադիր լինեմ»,-ասաց Պապիկյանը։
Նրա խոսքով՝ խնդիրը հանրային բնույթ ունի և պահանջում է համակարգային լուծումներ։
