Հայտարարվել է Սիսիան-Քաջարան ճանապարհի Հարավային հատվածի շինարարական աշխատանքների միջազգային մրցույթ
Ճանապարհային դեպարտամենտ հիմնադրամը հայտարարել է միջազգային երկփուլանի մրցույթ՝ Սիսիան–Քաջարան ավտոճանապարհի Հարավային հատվածի կառուցման շինարարական աշխատանքների ձեռքբերման նպատակով։ Ծրագիրը կիրականացվի Վերակառուցման և զարգացման եվրոպական բանկի և Եվրոպական ներդրումային բանկի համաֆինանսավորմամբ։
Գնումների գործընթացը կազմակերպվում է EBRD-ի էլեկտրոնային գնումների համակարգի (ECEPP) միջոցով՝ տվյալ հարթակի օգտագործման պայմաններին համապատասխան։ Մրցույթին մասնակցելու համար հետաքրքրված կազմակերպությունները պարտադիր պետք է գրանցվեն ECEPP համակարգում։
Միայն գրանցված և մասնակցության հայտ ներկայացրած մասնակիցները հնարավորություն կունենան ECEPP-ի միջոցով ներբեռնելու մրցութային փաստաթղթերը, ինչպես նաև ծանոթանալու պարզաբանումներին, լրացումներին և փոփոխություններին։
Շինարարական աշխատանքների շրջանակում նախատեսվում է Սիսիան–Քաջարան ճանապարհի Հարավային հատվածի շուրջ 24 կմ կառուցում։ Նշված հատվածը հանդիսանում է Հյուսիս–հարավ ճանապարհային միջանցքի կարևոր բաղադրիչներից մեկը։Մրցույթի վերաբերյալ լրացուցիչ և մանրամասն տեղեկատվությունը (անգլերեն) հասանելի է ECEPP հարթակում։
