Նշվել են սրտի համար ամենավտանգավոր սննդամթերքները
Առողջ ապրելակերպը և հավասարակշռված սննդակարգը սրտանոթային հիվանդությունների կանխարգելման հիմքն են: Այս մասին հայտարարել է «СМ-Клиника»-ի սրտաբան Անաստասիա Մալայը: Նա Lenta.ru-ի հետ զրույցում պատմել է նաև սրտի համար ամենավտանգավոր սննդամթերքների մասին:
Մալայը ընդգծել է, որ աղի ավելցուկը կարող է վնասակար լինել սրտի համար: «Աղի չափից շատ օգտագործումը հանգեցնում է հեղուկի կուտակման, բարձր արյան ճնշման և այտուցի: Կարևոր է հիշել, որ մեր սպառած աղի մոտ 80 տոկոսը մենք ստանում ենք ոչ թե աղամանից, այլ պատրաստի սննդից՝ հացից, երշիկեղենից, սոուսներից, պահածոյացված մթերքներից, կիսաֆաբրիկատներից և նույնիսկ թխվածքաբլիթներից»,- զգուշացրել է նա:
Սրտաբանի խոսքով՝ շաքարը ոչ պակաս վտանգավոր է սրտի և անոթների առողջության համար։ Այն հանդիպում է ոչ միայն աղանդերի, այլև թվացյալ անվտանգ շատ սննդամթերքների մեջ, ինչպիսիք են կաթնային կոկտեյլները և հացահատիկային շիլաները։ Շաքարի չափից շատ օգտագործումը խաթարում է նյութափոխանակությունը, հանգեցնում է ճարպակալման և թուլացնում է սրտի մկանները:
Մալայը նաև կոչ է արել խուսափել վերամշակված մսամթերքների՝ երշիկեղենի, հոթ-դոգերի և կիսաֆաբրիկատների սպառումից: Դրանք պարունակում են կոնսերվանտներ, համի ուժեղացուցիչներ և կայունացուցիչներ, որոնք կանոնավոր օգտագործման դեպքում կարող են վնասակար լինել սրտանոթային համակարգի համար:
