Թուրքիան արգելել է իսրայելական նավերին օգտվել իր նավահանգիստներից. Ֆիդան
Թուրքիան արգելել է իսրայելական քաղաքացիական նավերին օգտվել իր նավահանգիստներից։ Թուրքական նավերը նույնպես չեն օգտվի Իսրայելի նավահանգիստներից, ասել է արտգործնախարար Հաքան Ֆիդանը։ Նրա խոսքերը մեջբերել է ՌԻԱ Նովոստին։
«Աշխարհում չկա ոչ մի երկիր, որը պատժամիջոցների առումով ավելի հեռու գնա, քան Թուրքիան։ Մենք ամբողջությամբ դադարեցրել ենք առևտուրը Իսրայելի հետ։ Մենք փակել ենք մեր նավահանգիստները իսրայելական նավերի համար։ Մենք թույլ չենք տալիս թուրքական նավերին օգտվել Իսրայելի նավահանգիստներից։ Ես ընդգծում եմ, որ չկա որևէ այլ երկիր, որն ամբողջությամբ դադարեցրել է առևտուրը Իսրայելի հետ», – ասել է Ֆիդանը խորհրդարանում ելույթի ժամանակ։
Ֆիդանը նաև ասել է, որ Թուրքիան փակել է իր դռները Իսրայել զենք և զինամթերք տեղափոխող նավերի և ինքնաթիռների համար։
2024 թվականի մայիսին Թուրքիան ամբողջությամբ խզել է Իսրայելի հետ առևտրային բոլոր հարաբերությունները։ ԱԳ նախարարն ընդգծել է, որ որոշումը կչեղարկվի միայն այն դեպքում, երբ ապահովվի մարդասիրական օգնության անխափան մատակարարումը Գազայի հատված։
2024 թվականի ընթացքում Թուրքիայի կողմից իսրայելական ապրանքների ներմուծման ծավալը կազմել է 1.6 միլիարդ դոլար կամ թուրքական բոլոր ներմուծումների 0.45%-ը: Արտահանումը հասել է 5.4 միլիարդ դոլարի, որը կազմում է բոլոր մատակարարումների 2.13%-ը: Այսպիսով, առևտրի դադարեցումը Թուրքիայի համար կարժենա ամսական 450 միլիոն դոլար, իսկ Իսրայելի համար՝ 133 միլիոն դոլար:
