Հանրակրթության նոր չափորոշիչն այս ուսումնական տարում ներդրված կլինի 1- 11-րդ դասարաններում․ նախարար
Հանրակրթության նոր չափորոշիչն այս ուսումնական տարում ներդրված կլինի 1-11-րդ դասարաններում: Այս մասին հայտնել է Հայաստանի կրթության, գիտության, մշակույթի և սպորտի նախարար Ժաննա Անդրեասյանը Երևանի հանրակրթական դպրոցների տնօրենների ու վարչատնտեսական համակարգողների մասնակցությամբ տեղի ունեցած քննարկման ժամանակ։
«Չորրորդ և իններորդ դասարաններում գիտելիքի ստուգման գործընթացները կազմակերպվելու են նոր ձևով, ինչն արդեն երկու տարի Տավուշի մարզում փորձարկվել է. ունենք դրական փորձ և վստահ ենք, որ համատեղ աշխատանքով ուսումնական տարվա ավարտին կունենանք լավ արդյունքներ»,- նշել է նախարարը։
Ժաննա Անդրեասյանը գործընկերներին մաղթել է հաջողություններ նոր ուսումնական տարում՝ ընդգծելով, որ առաջիկա դժվարությունները պետք է հաղթահարվեն արդյունավետ համագործակցության, պատասխանատվության և կառավարչական ճիշտ մոտեցումների միջոցով։
Հաջորդաբար տեղի է ունեցել նաև քննարկում Երևանի նախադպրոցական և արտադպրոցական հաստատությունների ղեկավարների մասնակցությամբ։
