Տիգրան Ուլուբաբյանը կշարունակի մնալ կալանավորված

Տիգրան Ուլուբաբյանը կշարունակի մնալ կալանավորված։ Լոռու մարզի ընդհանուր իրավասության դատարանը բավարարել է Ուլուբաբյանի կալանքի ժամկետը երկարացնելու մասին քննիչի միջնորդությունը։ Այս մասին «Փաստինֆո»-ն տեղեկանում է փաստաբան Էրիկ Բեգլարյանից։

Հիշեցնենք, որ արցախցի Տիգրան Ուլուբաբյանը դեռևս 2025թ․ մարտին ահազանգել էր՝ իր նկատմամբ ոստիկանների կողմից բռնության գործադրման մասին՝ նշելով, որ իր նկատմամբ բռնություն է գործադրվել, հայհոյանքներով ու անհարգալից վերաբերմունքով ստիպել խոստովանական ցուցմունք տալ, իբրև թե իր բարեկամի տան վրա ավազակային հարձակում իրականացրած ենթադրյալ հանցագործների հետ կապ ունի:

Միայն բարձրացված աղմուկից հետո նախաձեռնվեց քրեական վարույթ՝ խոշտանգման հատկանիշներով, սակայն քրեական վարույթով ոչ միայն քրեական հետապնդում չիրականացվեց ոստիկանների նկատմամբ, այլև՝ վարույթն իրականացնող մարմինը որոշել է կարճել գործը, փոխարենն՝ այժմ կալանքի տակ է Տիգրան Ուլուբաբյանը՝ ավազակային հարձակմանն օժանդակելու մեղադրանքով: Ուլուբաբյանը համաձայն չէ մեղադրանքի հետ, պնդում է՝ առկա չէ որևէ ապացույց, որ կարող էր փաստել իր հնարավոր առնչությունը՝ դեպքին։