Ուկրաինայի համար անվտանգության երաշխիքների նախագծերը կարող են պատրաստ լինել հաջորդ շաբաթ
Ուկրաինայի անվտանգության երաշխիքների նախագիծը կարող է պատրաստ լինել հաջորդ շաբաթվա սկզբին, որից հետո կարող են սկսվել «քաղաքական ուղղությամբ» աշխատանքները։
Այս մասին NBC News-ին տված հարցազրույցում ասել է փոխարտգործնախարար Սերգեյ Կիսլիցան, որը Կիևի պատվիրակության կազմում է եղել օգոստոսի 18-ին Վոլոդիմիր Զելենսկու և ԱՄՆ նախագահ Դոնալդ Թրամփի հանդիպմանը։
«Եթե խոսքն անվտանգության երաշխիքների մասին է, ապա սա շատ կարևոր և բարդ հարց է։ Եվ առնվազն մեկ շաբաթ է անհրաժեշտ Ուկրաինայի անվտանգության երաշխիքների փաթեթի վերջնական նախագիծը պատրաստելու համար։ Իդեալական դեպքում մենք կարող ենք ունենալ առաջին նախագիծը հաջորդ շաբաթ, և այդ ժամանակ ղեկավարությունը պետք է որոշի, թե ինչպես ենք աշխատելու այս փաստաթղթի վրա քաղաքական առումով»,-ասել է Սերգեյ Կիսլիցան։
Նա նաև հավելել է, որ անվտանգության երաշխիքները պետք է համաձայնեցվեն Ուկրաինայի արևմտյան դաշնակիցների կողմից և չեն կարող լինել Ռուսաստանի հետ քննարկման առարկա։
Ավելի վաղ Սպիտակ տան մամուլի քարտուղար Քերոլայն Լիվիտը հայտարարել էր, որ Միացյալ Նահանգները Ռուսաստանի հետ կքննարկի Ուկրաինայի համար ընդունելի անվտանգության երաշխիքները։
