Թուրքիան հետերկրաշարժային ճգնաժամերի դեմ պայքարում կհետևի Ճապոնիայի օրինակին
Թուրքիայի տրանսպորտի և ենթակառուցվածքների նախարարությունն աշխատանքներ է մեկնարկել երկրաշարժի պարագայում առաջացող ճգնաժամային իրավիճակներում ավելի արդյունավետ հաղորդակցման մեթոդներ կիրառելու համար: Այս մասին տեղեկացնում է ermenihaber.am-ը։
Նշվում է, որ այս համատեքստում թուրքական կողմը աշխատանքներ է տանում Ճապոնիայում կիրառվող մոդելի ներմուծման ուղղությամբ:
Ըստ այդմ՝ նախարարությունը պատրաստվում է կիրառել «Ես լավ եմ և այստեղ եմ» հաղորդագրությունների համակարգը, որը թույլ է տալիս քաղաքացիներին հեռախոսով թողնել հաղորդագրություն՝ առանց գիծը ծանրաբեռնելու։
Նախատեսվում է նաև Թուրքիայի «Աղետների և արտակարգ իրավիճակների վարչությունում» (AFAD) ձևավորել ճգնաժամային կենտրոն՝ որտեղից կիրականացվի տարածքի ուսումնասիրում և գնահատում, ինչպես նաև բազային կայանների և անհրաժեշտ միջոցների տեղաբաշխում։
Այս համակարգի մեկնարկով ճգնաժամային իրավիճակներում բնակիչներին տրամադրվելու է անվճար զանգեր կատարելու, SMS հաղորդագրություններ ուղարկելու և ինտերնետային փաթեթներ ակտիվացնելու հնարավորություն։
Նշենք, որ ապրիլի 23-ին Ստամբուլում գրանցված 6,2 մագնիտուդ ուժգնությամբ երկրաշարժի ժամանակ 52 միլիոն քաղաքացիների միաժամանակյա զանգերը հանգեցրել էին հաղորդակցության շուրջ 10 րոպեանոց ընդհատման։
