ՀԱՊԿ-ը զորավարժություններին հատուկ ուշադրություն կդարձվի անօդաչու ավիացիայի կիրառմանը
2025 թվականին Հավաքական անվտանգության պայմանագրի կազմակերպության (ՀԱՊԿ) զորավարժությունները կանցկացվեն Բելառուսում, Ղրղզստանում և Տաջիկստանում։ Այս մասին ճեպազրույցի ժամանակ հայտարարեց ՀԱՊԿ Միացյալ շտաբի պետ Անդրեյ Սերդյուկովը։
Նրա խոսքով՝ բոլոր միջոցառումներն ու զորավարժությունները պլանային բնույթի են և ուղղված չեն երրորդ երկրների դեմ։ Դրանց նպատակն է կատարելագործել զորքերի կառավարման մարմինների աշխատանքը, ինչպես նաև պահպանել զորամիավորումների պատրաստվածությունը հավաքական անվտանգության ապահովման շահերից ելնելով առաջադրանքներ կատարելու համար։
Միևնույն ժամանակ, այս տարի հիմնական շեշտը դրվել է հավաքական անվտանգության Արևելյան Եվրոպայի և Կենտրոնական Ասիայի տարածաշրջանների վրա։
Ինչպես նշել է Սերդյուկովը, համատեղ զորավարժությունների մեկնարկից առաջ Միացյալ շտաբի սպաները կանցկացնեն պարապմունքներ՝ Հավաքական ուժերի խմբավորումների հրամանատարության կառավարման և համակարգման կազմակերպման վերաբերյալ՝ հաշվի առնելով Ռուսաստանի զինված ուժերի փորձը հատուկ ռազմական գործողության ընթացքում։
«Հատուկ ուշադրություն կդարձվի անօդաչու ավիացիայի կիրառմանը, որն այսօր դարձել է մարտական գործողություններ վարելու ամենաարդյունավետ միջոցներից մեկը, ինչպես նաև թշնամու ԱԹՍ–ներին հակազդելու համակարգի ստեղծման առանձնահատկություններին։ Անօդաչու թռչող սարքերի՝ տարբեր առաջադրանքներ կատարելու կարողությունը, ինչպիսիք են հետախուզությունը, կրակային հարվածները հասցնելը, նյութական միջոցների մատակարարումը, զգալիորեն մեծացրել է հնարավորությունները մարտադաշտում», – նշել է ՀԱՊԿ Միացյալ շտաբի պետը։
Ռադիոէլեկտրոնային պայքարի կազմակերպման և անցկացման միասնական մոտեցումներ ապահովելու համար զորախմբերը նախատեսում են զորավարժությունների ընթացքում փորձարկել Միացյալ շտաբի կողմից պաշտպանական գերատեսչությունների հետ համատեղ մշակված էլեկտրոնային պայքարի վերաբերյալ առաջարկությունները։ Բացի այդ, պայմանավորվածություններ են ձեռք բերվել համատեղ զորավարժությունների ընթացքում ՀԱՊԿ երկրների պաշտպանական արդյունաբերության առաջատար ձեռնարկությունների կողմից մշակված ժամանակակից զենքի, ռազմական և հատուկ տեխնիկայի հնարավորությունները ցուցադրելու վերաբերյալ։
«Օպերատիվ և մարտական պատրաստության հիմնական միջոցառումը Հավաքական արագ արձագանքման ուժերի հետ «Փոխգործակցություն 2025» համատեղ վարժանքներն են, որոնք սեպտեմբերի սկզբին կանցկացվեն Բելառուսի Հանրապետությունում», – ասել է Սերդյուկովը։
Այս հավաքների շրջանակում կանցկացվեն «Որոնում» հատուկ վարժանքները հետախուզական ուժերի և միջոցների կիրառմամբ և «Էշելոն» վարժանքները` նյութատեխնիկական ապահովման ուժերի կիրառմամբ։ Սեպտեմբերի երկրորդ տասնօրյակում Ղրղզստանում կանցկացվեն «Սահման 2025» հրամանատարաշտաբային վարժանքներ՝ Կենտրոնական Ասիայի տարածաշրջանի արագ արձագանքման հավաքական ուժերի ստորաբաժանումների հետ։
Մարտական գործողությունների պլանավորման ընթացքում կառավարման մարմինների համակարգումը բարելավելու նպատակով արագ արձագանքման հավաքական ուժերի հրամանատարության հետ օպերատիվ հավաք կանցկացվի։
«Վարժանքների ընթացքում կմշակվի անօրինական զինված կազմավորումների վերացմանն ուղղված մարտական գործողությունների պլանավորում և իրականացում՝ հաշվի առնելով լեռնային լանդշաֆտի առանձնահատկությունները, բոլոր փուլերում զորքերի հակաօդային պաշտպանությունը, լճային ջրատարածքից մարտական գործողությունների անցկացման շրջանի արգելափակումը», – ասել է Սերդյուկովը։
Նախատեսվում է նաև օգտագործել ՀԱՊԿ երկրների մարտական ավիացիան։
Հոկտեմբերի կեսերին Տաջիկստանում կանցկացվեն ՀԱՊԿ խաղաղապահ ուժերի «Անքակտելի եղբայրություն 2025» զորավարժությունները։
Առաջին անգամ հատուկ «Պատնեշ 2025» զորավարժություններ կանցկացվեն ճառագայթային-քիմիական-կենսաբանական պաշտպանության և բժշկական աջակցության համատեղ կազմավորման կողմից։
Զորավարժությունների ընթացքում նախատեսվում է առաջադրանքներ մշակել կենսաբանական սպառնալիքների վերացման ուղղությամբ։
Զորավարժությունների ակտիվ փուլերը կանցկացվեն համատեղ ձևաչափով, ԱՊՀ երկրների իրավասու մարմինների «Համագործակցություն-հակաահաբեկչություն-2025» համատեղ հակաահաբեկչական զորավարժությունների եզրափակիչ փուլով։
Ընդհանուր առմամբ, 2025 թվականի համատեղ զորավարժություններում կներգրավվի ավելի քան հինգ հազար անձնակազմ և մոտ հազար միավոր զենք, ռազմական և հատուկ տեխնիկա։
