Թրամփը Վաշինգտոնում անվտանգության միջոցառումները համեմատել է միգրանտներից սահմանների պաշտպանության հետ
ԱՄՆ նախագահ Դոնալդ Թրամփը կարծում է, որ Վաշինգտոնում անվտանգության ապահովման միջոցառումները արդյունավետություն են ցույց տվել, ինչպես նաև Մեքսիկայի հետ սահմանը անօրինական միգրանտների հոսքից պաշտպանելու միջոցառումները:
«Ինչպես մեր հարավային սահմանն է այժմ 100%-ով պաշտպանված, այնպես էլ Վաշինգտոնը և Կոլումբիայի շրջանն են այժմ նորից անվտանգ և մենք հենց նոր սկսեցինք վերականգնման գործընթացը», – Truth Social-ում գրել է ամերիկյան առաջնորդը։
Օգոստոսի 20-ին Թրամփը կարգադրել է Մեքսիկայի հետ սահմանի պատը սև ներկել, որպեսզի այն արևի տակ տաքանա և անօրինական միգրանտների համար ավելի դժվար լինի պատը բարձրանալ։ Բացի այդ, ԱՄՆ Սահմանային պարեկության ղեկավար Մայք Բենքսի խոսքով՝ սահմանին կտեղադրվեն լուսավորություն, տեսահսկման համակարգեր և սեյսմիկ սենսորներ։
ԱՄՆ նախագահը օգոստոսի 11-ին հայտարարել է, որ Ազգային գվարդիայի զինծառայողներին տեղափոխելու են մայրաքաղաք՝ հանցավորության դեմ պայքարելու համար։ Պետության ղեկավարը քաղաքի ոստիկանությունը դրել է դաշնային կառավարության վերահսկողության տակ և նշել, որ անհրաժեշտության դեպքում Վաշինգտոնի անվտանգությունն ապահովելու համար կարող են ներգրավվել նաև զինված ուժեր։ Օգոստոսի 18-ին The Washington Post թերթը հայտարարել է, որ Ազգային գվարդիայի զինծառայողները կարող են ստանալ հրազեն, իսկ Վաշինգտոնում արդեն ներգրավված 800 զինվորականներին մոտ օրերս կարող են միանալ ևս 750 հոգի։ Թրամփի կողմից Վաշինգտոնում Ազգային գվարդիայի ստորաբաժանումների տեղակայման մասին հայտարարությունից հետո մեկ շաբաթվա ընթացքում մայրաքաղաքում մոտ 300 մարդ է ձերբակալվել։
