Թուրքական հայտնի հանգստավայրում աղտոտվածության կրիտիկական մակարդակ է գրանցվել
Թուրքական Ալանիա հանգստավայրի մոտակայքում Միջերկրական ծովի աղտոտվածությունը հասել է վտանգավոր մակարդակի և սպառնում է ծովային բուսական և կենդանական աշխարհին։ Ջրի հետ շփումը կարող է հանգեցնել փսխման, սրտխառնոցի և ջերմության՝ մանրէների թվի աճի պատճառով, ասել է Միջերկրածովյան համալսարանի դոցենտ Գուրայ Դողանը։
Տեղացի բնակիչները նշում են, որ անցյալ տարվա համեմատ ջուրն ավելի պղտոր է դարձել, իսկ լողափերում պլաստիկ թափոնների քանակը զգալիորեն աճել է։
Դողանի խոսքով՝ Ալանիայի և Գազիփաշայի տարածքում էկոլոգիական հավասարակշռության խախտումը պայմանավորված է ոչ միայն զբոսաշրջությամբ, այլև ծով մտնող գյուղատնտեսական թափոններով, ինչպես նաև կլիմայի փոփոխությամբ, ինչը հանգեցնում է մանրէների թվի աճի։
«Ծովային էկոհամակարգին սպառնում են նաև լողափերից և նավակներից թափոնները, պլաստիկի չափազանց օգտագործումը», – ընդգծել է նա։
Բնապահպանները առաջարկում են ավելացնել աղբահանության կանոնավոր ծավալը, ստեղծել համատեղ աուդիտի ծրագիր զբոսաշրջության և գյուղատնտեսության ոլորտների համար, ինչպես նաև բարձրացնել բնակչության շրջակա միջավայրի վերաբերյալ իրազեկվածությունը՝ աղտոտվածությունը նվազեցնելու կրթական ծրագրերի միջոցով։
