Իրանի իշխանությունները զինված ուժերի պաշտպանունակության ամրապնդման ծրագիր են մշակել

Իրանցի բարձրաստիճան օրենսդիրը հայտարարել է, որ խորհրդարանն ու կառավարությունը լուրջ քայլեր են ձեռնարկում զինված ուժերի հզորացման ուղղությամբ՝ հավելելով, որ խորհրդարան կներկայացվի պաշտպանունակության ամրապնդման մասին օրինագիծ, հայտնում է Mehr-ը։

Իրանի խորհրդարանի ազգային անվտանգության և արտաքին քաղաքականության հանձնաժողովի նախագահ Էբրահիմ Ազիզին Mehr-ին տված հարցազրույցում ասել է, որ «զինված ուժերի պաշտպանունակության ամրապնդումը ներկա իրավիճակում ամենակարևոր և ռազմավարական հարցերից է, և, անկասկած, կառավարությունն ու խորհրդարանը հաստատակամ քայլեր են ձեռնարկում այդ նպատակին հասնելու համար»։

Խոսելով զինված ուժերի պաշտպանունակության բարձրացման ուղղությամբ կառավարության ձեռնարկած միջոցների մասին՝ նա հավելել է, որ կառավարությունը մի շարք միջոցառումներ է նախաձեռնել երկրի պաշտպանունակության բարձրացման համար, և այդ կապակցությամբ խորհրդարանը ներկայացրել է «Զինված ուժերի հզորության ամրապնդում» վերնագրով առաջարկ։

Ազիզին նշել է, որ այս ծրագիրը վերջերս քննարկվել և հավանության է արժանացել Խորհրդարանի ազգային անվտանգության և արտաքին քաղաքականության հանձնաժողովի կողմից՝ Զինված ուժերի գլխավոր շտաբի, Պաշտպանության և զինված ուժերի նյութատեխնիկական ապահովման նախարարության, ինչպես նաև համապատասխան գերատեսչությունների պաշտոնյաների մասնակցությամբ նիստում, և շուտով կներկայացվի խորհրդարանի նախագահությանը՝ բաց նիստում քննարկելու և հաստատելու համար։