«Ռեալ Մադրիդը» քննադատել է «Բարսելոնայի» մասնակցությամբ Լա Լիգայի խաղը ԱՄՆ-ում անցկացնելու գաղափարը
Մադրիդի «Ռեալը» իր պաշտոնական կայքում հայտարարություն է հրապարակել, որով դատապարտում է «Վիլյառեալի» և «Բարսելոնայի» միջև Իսպանիայի Պրիմերայի խաղը Միացյալ Նահանգներում կազմակերպելու նախաձեռնությունը։
Ավելի վաղ լրատվամիջոցները հայտնել էին, որ երկուշաբթի՝ օգոստոսի 11-ին, Իսպանիայի ֆուտբոլի թագավորական ֆեդերացիան (RFEF) հաստատել է որոշումը։
«Ռեալ Մադրիդը», դիմելով ակումբի պաշտոնապես գրանցված անդամներին և երկրպագուներին, հայտարարել է, որ վճռականորեն դեմ է «Վիլյառեալի» և «Բարսելոնայի» միջև առաջնության 17-րդ տուրի խաղը Իսպանիայի սահմաններից դուրս անցկացնելուն:
«Այս որոշումը կայացվել է առանց մրցաշարին մասնակցող ակումբների հետ խորհրդակցության: Մրցաշարի արդարությունը պահանջում է, որ բոլոր խաղերը կազմակերպվեն նույն պայմաններում։ Նմանօրինակ միակողմանի փոփոխությունը խախտում է մրցակիցների հավասարությունը, վտանգում է արդյունքների օրինականությունը և ստեղծում է անընդունելի նախադեպ»,- ասված է «սերուցքայինների» հաղորդագրության մեջ։
