Թուրքիան ողջունում է Պաղեստինը ճանաչել ցանկացող երկրների քայլերը. Էրդողան
Թուրքիայի նախագահ Ռեջեփ Թայիփ Էրդողանը հինգշաբթի հայտարարել է, որ ողջունում է Ֆրանսիայի, Մեծ Բրիտանիայի և այլ երկրների կողմից Պաղեստինի պետությունը ճանաչելու ուղղությամբ ձեռնարկված վերջին քայլերը, հաղորդում է Reuters-ը։
«Մենք շատ արժեքավոր ենք համարում Եվրոպայից, մասնավորապես՝ Ֆրանսիայից և Մեծ Բրիտանիայից ստացված վերջին մարդասիրական արձագանքը։ Ողջունում ենք Պաղեստինի պետության ճանաչման ուղղությամբ ձեռնարկված յուրաքանչյուր քայլ», -ընդգծել է Էրդողանը։
Անկարայում ունեցած ելույթի ժամանակ Էրդողանը նշել է, որ զանգահարել է Ֆրանսիայի նախագահ Էմանուել Մակրոնին՝ շնորհավորելու նրան որոշման կապակցությամբ։
Նա հավելել է, որ երկու պետությունների լուծմանն աջակցելը կլինի Իսրայելի քաղաքականության դեմ ամենաարդյունավետ դիրքորոշումը։
