Սիրիայի նոր արտգործնախարարը հայտարարել է՝ Ռուսաստանի հետ հարաբերությունները «անցյալի հիմքի վրա չեն կառուցվի»
Սիրիայում իշխանությունը վերցրած ուժի կողմից արտգործնախարար նշանակված Ասադ ալ-Շեյբանին այսօր Մոսկվայում հանդիպել է Ռուսաստանի արտգործնախարար Սերգեյ Լավրովի հետ, իսկ բանակցությունների ավարտին տեղի ունեցած մամուլի ասուլիսի ժամանակ հայտարարել է, որ Ռուսաստանի և Սիրիայի համագործակցությունը «չի կառուցվելու անցյալի հիմքի վրա»։
«Մենք քննարկեցինք, թե ինչպես կարող է Ռուսաստանը մասնակցել Սիրիայի տնտեսության վերականգնմանը՝ միջազգային իրավունքի և մեր ժողովրդի շահերի տեսանկյունից։ Եվ ահա՝ մեր համագործակցությունը հիմնված չի լինի անցյալի վրա, այն հիմնված կլինի օրենքների նկատմամբ հարգանքի և պատասխանատվությունը կիսելու սկզբունքի վրա։ Մենք մեր ռուս գործընկերների հետ քննարկումներում շեշտում ենք՝ շարունակելու ենք կառուցել մեր պետությունը»,- ասել է Սիրիայի նոր արտգործնախարարը՝ Սերգեյ Լավրովի հետ ասուլիսի ժամանակ։
Ասադ ալ-Շեյբանին հավելել է, թե Սիրիան այսօր «վերականգնում է իր ավանդական տեղը միջազգային ասպարեզում՝ հաստատելով իրավազոր ու ինքնիշխան գործընկերային հարաբերություններ»։
