Ուկրաինան և ԱՄՆ-ն օգտակար հանածոների համաձայնագրի շուրջ խորհրդակցություններ են անցկացնում նախարարների մակարդակով
Ուկրաինայի և Միացյալ Նահանգների նախարարությունները խորհրդակցություններ են անցկացնում օգտակար հանածոների համաձայնագրի նոր նախագծի շուրջ։
Այդ մասին Reuters գործակալությանը հայտնել է Ուկրաինայի նախագահ Վոլոդիմիր Զելենսկիի գրասենյակի ղեկավարի խորհրդական Միխայիլ Պոդոլյակը։
«Խորհրդակցությունները դեռ շարունակվում են տարբեր նախարարությունների մակարդակով», – ասել է նա՝ մեկնաբանելով մամուլում հայտնված համաձայնագրի նոր նախագիծը։ Ավելի վաղ համաձայնագրի վրա աշխատանքը հաստատել էր Ուկրաինայի առաջին փոխվարչապետ, էկոնոմիկայի նախարար Յուլյա Սվիրիդենկոն։
Վոլոդիմիր Զելենսկին հայտարարել էր, որ ԱՄՆ-ն իսկապես Ուկրաինային է փոխանցել օգտակար հանածոների շուրջ համաձայնագրի նոր նախագիծը, որտեղ մանրամասնորեն նշված են երկրի վերականգնման հիմնադրամի ստեղծման պայմանները։
ԱՄՆ ֆինանսների նախարար Սքոթ Բեսենտը մարտի 26-ին հայտարարել էր, որ Միացյալ Նահանգները և Ուկրաինան կարող են արդեն հաջորդ շաբաթ ստորագրել տնտեսական համագործակցության, այդ թվում՝ օգտակար հանածոների շուրջ համաձայնագիրը:
