Մեր ռազմավարության մեջ հայկական խոհանոցը, որպես ազգային արժեք է. Փաշինյան
ՀՀ-ում պետք է ակտիվանա ոչ նյութական արժեքների նյութականացման գործընթացը։ Այս մասին ՀՀ կառավարության նիստի ժամանակ ասաց Նիկոլ Փաշինյանը։
«Եթե մեզ թվում է, թե մենք ամեն օր չունենք այսպիսի կորսվող նյութական արժեքներ, չարաչար սխալվում ենք։ Մեր տատիկների, պապիկների` Աստված բոլորի հոգիները լուսավորի, մահվան հետ ոչ նյութական արժեքներն անէանում են, եթե դրանք բավարար չափով փաստագրված չեն»,- հայտարարեց նա։
Նրա խոսքոցվ՝ տարբեր մարզային այցերի ժամանակ հասկացել են, որ ոչ նյութական արժեք է նաև մեր խոհանոցը, այդ մասին նաև նշվել է ՀՀ ազգային անվտանգության ռազմավարության մեջ։
«Երբ տարբեր գյուղեր գնում ենք, մարդիկ իրենց մշակույթն են ներկայացնում, կենցաղը, երբեմն հյուրասիրություն է լինում, ու այդ ժամանակ մենք տեսնում ենք ուտեստներ, որոնք անծանոթ են։ Երբ մտնում ենք, օրինակ` մի 3 կմ այն կողմ գտնվող ռեստորան, հարցնում ենք` այս ճաշատեսակից ունե՞ք, զարմացած հարցնում են` դա ի՞նչ է»,– ասաց Փաշինյանը։
Այս դեպքերից հետո նա որոշում է կայացրել գրանտային կամ մրցութային ծրագիր իրականացնել, որպեսզի մասնագետներն անցնեն բնակավայրերով և գրանցեն յուրահատուկ ճաշատեսակները։
Դրա նպատակը, Փաշինյանի խոսքով, արխիվացնելը չէ, այլ զբոսաշրջության զարգացման տեսանկյունից համագործակցել հանրային սննդի օբյեկտների հետ, որպեսզի նրանք իրենց ճաշացանկում ներառեն այդ բաղադրատոմսերը։
Փաշինյանն ընդգծեց, որ պատրաստվում են կատալոգներ հրատարակել, համացանցում արդեն իսկ կան համապատասխան կայքեր, որտեղ ոչ միայն ճաշատեսակների բաղադրատոմսեր կան, այլ լուսանկարներ, նյութեր, որոնք ցույց են տալիս, թե տվյալ սնունդը վերջնական փուլում ինչ պատկեր ունի։
